Manehador di Harley Davidson a perde su bida riba Rotonde Sasaki

Fin di siman a cuminza cu e informe tristo, ora cu manehador di un Harley Davidson a perde su bida riba e rotonde Sasaki.
Caminda tabata seco e momento ey, y tur cos ta mustra cu poco despues di 4:00 a.m., e manehador a perde control riba e Harley. E tabata forma parti di un trio di ciclista cu tabata bayendo zuid riba Sasakiweg. Yegando e Rotonde, e victima a djis sigui core straight, subi Rotonde y dal violentamente cu su cara riba e borchi trafico, y despues di esaki cay abao, y sigui dal riba e rotonde mes.
E amigonan a brake y core yega, a bin haye benta eybao y mesora a bati alarma. E tabatin helm bisti, pero e golpi head-on di su cabez contra e borchi a causa trauma inmenso cu consecuencia fatal.
Polisnan a yega mesora, incluyendo Polisnan Motoriza, cu a nota cu e accidente ta serio, y cu e manehador a fayece. Paramediconan tambe a yega, pero nan no por haci nada mas.
A solicita presencia di un medico, y Dr. T.H.K. Lin a presenta pa 5:00 a.m., y a constata morto di Ivan Carroll Gregory Simon, mihor conoci como "Coy", naci na Aruba dia 2 di December 1965 (Edad: 46 aña) y biba na Catiri. E ta bon conoci tambe pa su trabao na.Playa Liquor.
E fayecimento di Coy, a crea un tristeza enorme na e lugar entre e miembronan local di diferente club di Harley Davidson. Nan tabata inconsolable. Funeraria Mementomori Funeral Home a transporta e restonan mortal.
Na famia y amigonan di e fayecido, Awe24.com ta manda su mas profundo palabra di condolencia.