Persona cu a bay snorkel na Barcadera a ser encontra sin bida

Diabierna atardi a drenta informe di un persona lo a hoga na Barcadera, mesora a dirigi polis y ambulans na e sitio. Na yegada a bin compronde cu aki ta trata di e ciudadano di fam D. cu a bay snorkel pero na un dado momento a ser encontra sin bida den e lama. Dokter Lin a presenta na e sitio y a constata morto.

Relato policial:
Diabierna atardi pa mas o menos 2'or y 50 central di polis ta haya un yamada cu algun trahador, den e area di Barcadera a bin haya un homber ta drief den awa. Mesora central ta manda patrouille di Santa Cruz y polis maritimo na e sitio cu ta bin encontra un hende homber flotando y no ta duna señal di bida.
Nan ta transporte cu boto pa waf di Barcadera unda cu Dr Lin ta constata morto door di hogamento di:

Edmund Olivio Dañe nasi na Aruba dia 16 di juli 1947 biba na Sombre 17.

Recherche , TOD y otro autoridadnan competente ta bay na e sitio pa investigacion, pero no a haya ningun indicacion di un crimen ya cu ta parse cu e victima tabata bezig ta snorkel y lo a hoga. Fiscal no a haya ta necesario pa tuma curpa den beslag.

Slachtofferhulp di polis ta bezig ta dunando sosten na e famianan den e momentonan dificil aki.

Di parti di Cuerpo Policial y tambe di awe24.com nos ta extende palabranan di condolencia na famia di e fayecido.