Cylinder transporta den baki di pick-up a cuminsa spuit gas pasobra e tabata mal mara

Diahuebs mainta a drenta informe di cu tin un auto na candela patras di B55 Restaurant banda di Drive Inn, mesora a dirigi tanto polis como bombero na e sitio. Na yegada di e patruya a bin compronde cu aki no ta trata di un auto na candela pero un escape di gas for di un di e tankinan, ta asina cu e chofer di e pick-up hunto cu su yiu homber chikito mester a core bandona e auto pasobra e tabata transportando 2 botter di gas den e baki y un di esakinan a cuminza spuit gas afo. Mirando e peliger di un botter di gas cu ta bezig ta spuit hopi gas afo ela tuma distancia di e pick up cu tabata sakando holor fuerte di gas estando den aire liber. Na yegada di bombero nan a controla e botternan y enberdad un di e botternan e valve a habri completo. Esey a bin door cu e strapnan cu tabata mara rond di e botter di gas, tabata feila na e valve anto combina cu e movecion di e auto un di e valvenan a habri.
Aki nan por mira cu ta masha peligroso pa transporta botter di gas den auto particular. Semper ta miho pa laga e truck di Arugas mes transporte, of mester controla bon con ta mara e botter di gas, prome cu sali cune for di Arugas. Afortunadamente ningun hende a resulta herida, pero si e chofer a pasa den susto di su bida.