PDR: Ley di Zonificacion no ta premira ningun parke di molina na Noord

PDR: Ley di Zonificacion no ta premira ningun parke di molina na Noord

Andin Bikker cu preguntanan na Gobierno si a tene cuenta cu e ley

PDR a lansa preguntanan clave na Gobierno riba e proyecto di parke di molina na Noord. Durante e encuentro informativo den Parlamento a resalta e.o. cu ni e desaroyador ni e autor di e rapport di impacto ambiental (“MER”) por a contesta PDR, cu si nan a realisa cu mester observa e Ley di Zonificacion, cual no ta premira ningun parke di molina na Noord. Den e "Ruimtelijke Ontwikkelingsplan" ("ROP") di 2009 ta papia solamente di molinan na Vader Piet. Cu otro palabra e ROP no ta delinea den ningun manera cu den e areanan na Noord lo bay bin un desaroyo asina impactante manera 10 molina di biento di 140 meter di haltura cada un, cu edificionan y infrastructura di servicio, cu tur e posibel efectonan secundario riba e.o. e paisaje, salud di habitante, molester di sonido, impacto riba parhanan etc. etc. Segun leynan Hulandes, di cual e Ley di Zonifacion di Aruba ta deriva, den casonan asina mester cambia e “bestemmingsplan” y/of duna dispensacionan etc. pa por ehecuta un proyecto asina impactante.

Recientemente e.o. partido CDA, cu ta liga na partido AVP, a para un proyecto similar na Maastricht dor di nenga di aproba cambio di e “bestemmingsplan” pa un parke di molina, a base di preocupacionan pa cu e salud y/of molester na e habitantenan. Aki na Aruba e Ley di Zonifacion y e ROP mester wordo observa, locual ta logico: no por ta asina cu habitantenan despues cu e ROP a wordo proclama na 2009 sin cu a premira ningun clase di parke di molina di biento na Noord, awo ta wordo confronta cu un desaroyo impactante cu nan no por a spera ni tene cuenta cune. E splicacion riba di e Ley di Zonifacion ta bisa juist cu e ROP “ta duna finalmente perspectiva den tempo, ja asina Gobierno y Poblacion por tene cuenta unda e desaroyo lo hiba na dje” (traduccion AB).

Ironia ta cu Gobierno y DIP constantemente ta atene Pueblo na destinacion "berde" y/of "no-industrial" poni den e ROP pa cu terenonan priva, anto ora ta toca e desaroyador actual pa un proyecto di Gobierno ta parce cu ta gewoon ignora e ley! Ley pa un, ley pa tur: den pasado ta varios proyecto di sector priva a wordo para paso DIP ta keda para ariba cu den e ROP e proyectonan no a wordo premira y cu no lo ta posibel sin cambio di ROP of dispensacion special. Awo ta interesante pa haya sa con DIP ta conseha Gobierno riba e proyecto aki paso ningun caminda den ROP ta premira un parke di molina di biento na Urirama.

Partido Democracia Real