Ademas di a faya den justicia, e minister a demostra su incapacidad den enseñanza

Ultimamente nos a bin ta ricibi cantidad di comentario di cu por mira con enseñanza a para bira negoshi y mas negoshi aki na Aruba, ya caba e situacion financiero di e ciudadano ta malisimo y awor kier primi e pueblo pa saca mas placa for di dje. Gobierno a bin ta permiti cu schoolnan pa comercialisa y haci negoshi na schoolnan. Aki nos ta bay trese e puntonan un pa un pa e pueblo mes comproba.
Pagamento di schoolgeld, ta un abuso di cu pa cada mucha mester bay banco para den rij pa asina regala e banconan 5 florin cual e mayor mes tin cu paga ademas di e schoolgeld pa cada yiu cu bay school. Na algun school ta manda e cobransa den 2 of 3 parti haciendo asina cu e mayornan mester bay para den rij na banco pa bolbe regala banconan 5 florin di cada mucha.
Bukinan y boekenfonds, tin school ta forza e muchanan cu nan mester cumpra Grote Bos Atlas na comienzo di schooljaar anto esaki mester ta esun imprimi mas recien pues si un yiu cu a caba school no por pasa e atlas pa su otro ruman ya cu un edicion nobo a sali y ta esun ey mester. Boekenfonds aki tambe ta presenta su mes e 5 florin cu mayornan mester paga pa cada yiu pero esaki ta no ser specifica for di tempran pero ta ser calcula den 2 of 3 pago cual mayornan ta ser forza pa paga. Tin reclamo di mayornan cu a bisa cu tin bukinan cu muchanan no a ricibi y durante e schooljaar e muchanan ta haya fotocopie di esakinan. Algo mas tristo ta cu tin boeki cu e muchanan ni a usa mes pero nan ta ser forza pa paga. Cada biaha e bukinan ta cambia y esaki a cuminsa bira un abuso cual mayornan mester paga pe.
Uniform, e asunto di uniform ta un abuso cu mayornan mester paga demasiado pa uniformnan y ta unicamente na un solo negoshi por busca esakinan mientras cu tin varios otro negoshi cu por entrega esakinan hopi mas barata te hasta na menos cu mitar di e prijs di e otro. A para bira awor cu cada aña ta cambia e color di e uniform mientras cu tin muchanan cu nan uniform por sigui wordo usa pa 2 of te hasta 3 aña y por bisa cu un ruman por pasa su uniform pa e otro ruman ora esaki no ta sirbie mas. Pa caba di exagera e asunto un poco mas awor ta bin exigi uniform special pa haci gymnastiek, unda nos ta bay? Na algun school por mira cu a cuminza exigi un tipo di tas cu mester wordo cumpra na un lugar especifico, sino bo no ta ser permiti pa drenta cura di school.
Propaganda na schoolnan, ultimamente por ripara cu mas y mas negoshinan ta bay na schoolnan y haci propaganda pa nan productonan y servicionan, nan ta presenta e.o. lecturanan of presentacionnan unda ta puro propaganda ta ser haci y ta haci uso di e muchanan pa logra nan metanan te hasta saca foto y filma na schoolnan. Flyersnan ta ser reparti unda ta haci propaganda of promocionnan te hasta ta regala muchanan caarchi pa un of otro evento a sabiendas cu e muchanan so no por bay e sitionan ey. Esaki no por! Un compania di refresco a bini cu un bebida nobo riba mercado y ta pasa na e schoolnan y reparti esakinan como promocion. Nan ta haci esaki sin puntra e mayornan si nan yiunan por bebe esakinan ya cu tin ingredientenan den e bebida cu e muchanan por ta alergico pa esakinan.
Ta permiti encuestanan ta ser haci unda ta bin papia cosnan for di sla y cu ni ta alcaso, ta toca temanan di e.o. sexualidad unda kizas e muchanan ainda no ta prepara pa esey. Tambe un otro asunto delicado ta e asunto di Jeugdgezondheidszorg cu ta bay controla e muchanan den grupo of individual sin presencia di nan mayornan cual ta inacceptable. Pa colmo awor a duna permiso na un fundacion pa bay atende cu e muchanan cu ta yen of gordo unda na school mes por bay trece e problemanan psycologico ya cu esnan cu ta bay atende cu esakinan no ta hendenan prepara profesionalmente.
Un otro punto tambe ta cu tin comerciantenan ta haci uso di e.o. edificio (localnan), infrastructura, materialnan, ta gasta coriente di airco y usa computernan di schoolnan pa nan (e comerciantenan cu ta duna les) gana placa sin cumpra edificio, sin paga coriente, sin cumpra computer etc. pa nan gana placa riba custia di propiedadnan di pueblo(lesa gobierno). SI e computernan daña of algo pasa nan ken lo cubri e gastonan ey? Esakinan ta comerciantenan oportunista y abusador claro cu bendicion di e minister di enseñanza cu ta permiti tur e abusonan aki y hopi otro mas.
Por ultimo e calidad di enseñanza a bay hopi atras, e minister ta permiti mas y mas pa kende cu ta cu ainda no tin e preparacion necesario of hasta ni caba cu nan estudio pa bin para dilanti di klas ya cu tin escases di maestro. Pa duna les of para dilanti klas bo mester tin un titulo pedagogico, sino no por. Enseñansa ta sagrado y no por ser mancha cu cosnan cu no ta acceptable.
Tin mas keho cu nos a ricibi pero na otro ocasion nos lo presenta esakinan.
Criminalidad a aumenta drasticamente y enseñansa a degrada completamente na man di e minister actual.
2 pregunta pa pueblo!
1 Criminalidad a baha si of no?
2 Enseñanza a degrada si of no?