Banda di Drive Inn un Vcar a slip riba caminda bay dal riba Takelwagen

Dialuna atardi a drenta informe di un accidente cu hende herida banda di Drive Inn, mesora a dirigi tanto polis como ambulans na e sitio. Na yegada di e patruya a bin compronde cu un V-Car cu dos dama turista den dje a slip y por poco a drenta bao di un takelwagen transportando un auto na e momento ey. Un di e damanan cu tabata den e vcar tabata keha di e dolor na su barica, door di e seatbelt cu e tabata tin bisti y cu durante e impacto esaki lo a primie na su area abdominal basta fuerte. Segun nos por a compronde di e chofer di e takelwagen, tabata bayendo San Nicolas, ora cu V-Car a hala un banda y door cu e caminda tabata muha a slip y keda bin directo ariba e takelwagen, mucho e chofer di takelwagen no por a haci cu purba hala un poco pa evita cu e V car lo por a drenta bao di e takelwagen. E V-car a dal net ariba e parti dilanti banda di chofer. Un impacto basta fuerte por cierto, paso e takelwagen tampoco por a sigi core y mester a ser pidi pa un otro takelwagen. Ambulans a presenta na e sitio y a atende e dama y despues a transporte pa hospital.