Hubert ‘Lio’ Booi - 93 aña un homenahe altamente mereci pa un personahe altamente aprecia

Hubert “Lio” Booi, e cabayero amabel, elegante, yen di zjeito, cu semper tin un cantica pa canta pa bo, un poema pa recita pa bo, un pintura pa regala bo, ta cumpli 93 aña diaranson awor, dia 25 di juli 2012.
Pueblo Arubano ta haya e oportunidad pa celebra e fecha memorabel aki hunto cu Lio durante un manisfestacion cultural dilanti Lio su cas.
Lio Booi ta un persona multifacetico cu, banda di su carera profesional, tabata sumamente activo tambe riba tereno social y cultural.
Lio a nace na Boneiro dia 25 di juli 1919 y for di 1937 e ta biba na Aruba.

Hubert Booi como profesional na Aruba
For di dia cu el a pone pia riba suela di Aruba, el a demostra su aprecio pa e isla aki cu su hendenan y su cultura.
El a cuminsa su carera profesional como hoben di 18 aña na “Hollansche Bank Unie” den departamento di contabilidad caminda el a sigui desaroya te bira procuratiehouder. Na e banco aki el a traha 23 aña. Su carera a sigui despues den diferente departamento di gobierno como empleado publico, pa ta exacto na WEB, Toeristenbureau, Arubaanse Voorlichtingsdienst, Departamento di Cultura y Educacion y finalmente na Instituto di Cultura. For di 1980 Lio ta gosa di un pensioen mereci.

Desaroyo di Lio su talento artistico
Su carera profesional no a stroba Lio di sigui desaroya su talentonan artistico y di duna prueba di esey. Al contrario, durante su trabou na Departamento di Cultura y Educacion y na Instituto di Cultura el a pone un base pa promocion di cultura Arubiano y di idioma Papiamento.
Lio a profila su mes como autor y poeta, como actor, como orador y declamado y hasta como actor y pintor. El a duna diferente curso di pintamento y como promotor di Papiamento el a duna curso di Papiamento tambe.
Specialmente su produccion literario a hala atencion. El a skirbi obra di diferente genero: obra teatral, letra di cantica, ensayo, storia cortico, poesia. Ademas e tin diferente traduccion literario riba su nomber, tanto di storia, teatro, cantica, como di radio novela.
Hopi di su canticanan a bira clasico aki na Aruba. ‘Urjunchi”, “Chanita”, “Fiesta den cura”. Ken no sa canta nan?

Publicacion di Lio
Algun publicacion literario di Lio Booi ta:
“Golgotha”, un drama religioso cu a sali den “Antilliaanse Cahiers” na 1967,
“Muchila”, un antologia di diferente obra di Lio, publica na 1969,
“E Flamingo di Aruba”, un antologia grandi di e obra total di Lio, publica pa Editorial Charuba na 2006.
Y ken no ta corda cu nostalgia e exito grandi di su obranan musical “E perla di Caribe’ di 1955 y “Amor di Kibaima” di 1969?
Tin diferente obra mas di Lio cu a bira inmortal.
E di tres couplet di nos himno “Aruba dushi tera” ta su inspiracion: “Grandesa di bo pueblo ta su gran cordialidad. Cu Dios por guia y conserva su amor pa libertad.”
Y poco hende sa, cu e letra di e himno di Boneiro tambe a sali di e pen di Lio.
E storia cortico “Un pal’i kwihi ta conta su storia” ta, segun Dr. Henry Habibe den su articulo “Pabien na e Flamingo di Aruba” skirbi na ocacion di Lio su 90 aña,”un kuenta ku ta buta ku Hubert Booi ta riba e mesun nivel literario ku otro famoso kuentistanan di Papiamento manera Pierre Lauffer, Elis Juliana i Luis Daal.”

Lio aprecia y reconoci
Pa su trabou profesional, social y artistico Lio a ricibi masha hopi condecoracion, premio y reconocemento di un cantidad di diferente instancia cu a y ta reconoce e balor di un hende manera Shon Lio. Ta interesante pa tira un bista den e lista largo aki.
- Orden Francisco de Miranda
- Officier in de Orde van Oranje-Nassau
- Gran Mariscal de Ayacucho
- Paul Harris Fellow Award di Aruba Rotary International
- Noveno Festival Internacional di teatro dedica na Hubert Booi na 1994
- Reconocimento di Cultureel Centrum Aruba (CCA) na 1994
- Homenahe y exposicion dedica na Hubert Lio Booi organisa pa Biblioteca Nacional Aruba titula “E Flamingo Arubiano” na 1998
- Premio Motito y Rufo Wever ta duna homahe na Hubert Lio Booi
- Premio di Papiamento “Cadushi di Cristal” na 1999
- Reconocimento dor di “Comision Celebracion Dianan Nacional” en conexion cu 25 aña Himno y Bandera y 15 aña Status Aparte na 2001
- Ciudadano di Honor di Boneiro na 2000
- Union Mutualista Boneireano na 2001
- Plaza Hubert O. (Lio) Booi na Instituto di Cultura inaugura. 2003
- Aruba Quality Foundation Vision 2005
- Invitado como autor na Crusa Lama, festival internacional di Literatura na 2007
- Simia di Glas otorga na Lio Booi na Hofi Literario durante un anochi di literatura y musica dedica na Lio Booi (oct.2009)
- “Su anochi” Homenahe na Lio Booi na Departamento di Arubiana di BNA. (sept. 2009)
- Homenahe na Hubert Lio Booi den Concierto Dominical (july 2009)
- Miembro honorario di Fundacion Lanta Papiamento (2010)

Y diarason awor pues Shon Lio ta ricibi un homenahe mas, e biaha aki di henter pueblo di Aruba. Aruba ta gradici Shon Lio inmensamente pa su trabou profesional, social y cultural, y mas ainda pa su personalidad cariñoso y inspirado.
Shon Lio, pueblo di Aruba ta desea bo hopi aña mas, den felis compania di bo famia y bo amigonan. Gosa di e fiesta aki.