Victima cu a ser maltrata pa un gang na United Dinner a subi auto core bay pero a bira malo na caminda

Diaranzon anochi a drenta informe di cu tin un pelea formal andando banda di United Dinner den Driemasterstraat, mesora a dirigi algun patruya na e sitio. Na yegada di e patruya ya no tabata tin ningun bringamento mas pero si hopi hende pero ningun tabata bisa algo. Un rato despues a drenta informe cu un persona a bira malo tras di stuur na Bushiri, mesora a dirigi un ambulans na e sitio. Na yegada di e ambulans a bin resulta cu e victima cu lo a ser maltrata na United Dinner a subi su auto y a core bay pero na Bushiri e no por a yega mas leu. E personal di ambulans a atende y a transporte pa hospital mientras polis a ser informa di esaki.