Reaccion riba caso: "Sra, Canades terorisa na Verano door di bisiña"

Cuerpo Policial a tuma nota di un noticia cu a sali den prensa local
over di un caso na Verano unda cu un pareha di edad, cu supuestamente lo
mester ta wordo terrorisa door di bisiña, lo no ta haya atencion di
Polis.

Esaki sigur no ta e caso. For di dia cu e problema a cuminsa polis semper a duna atencion na esaki.

1. A manda diferente patrouille ora cu asistencia a ser pidi.
2. Patrouillenan a papia cu ambos partido na varios ocasion pa purba yega na un solucion pacifico pa e problema. Semper a purba splika nan nan derecho y nan obligacionnan.
3. Kehonan cu a wordo entrega di hechonan castigabel a wordo investiga te asina leu cu e evidencia a permiti. Pa hasi esaki a envolve recherche.
4. A hasta asigna Polis di Bario di Dakota pa duna atencion special regular na e caso ya cu e ta un caso cu ta keda sosode y ta causa hopi molester. Investigacion y atencion regular a cuminsa duna su fruta ya cu e situacion tabata bou control pa basta dia.
5. A tuma contacto cu otro instancianan pa yuda den e caso aki (FCCA) ya cu loke tabata ser pidi no ta tarea di polis, cu ta pa obliga hende pa muda.
6. Dia 28 di juli un di e partidonan segun informacion lo a bebe burachi y tira piedra riba cas di e señora, pa cual e la acusa su bisiña. Investigacion a bin saca na cla cu no tabata e bisiña en cuestion a hasi esaki pero un otro person cu dia 1 di augustus 2012 a ser deteni (homber M.F.) pendiente investigacion.
7. Mirando cu probablemente ta trata di otro asuntonan personal cu ta causando e reaccionnan fuerte aki a disidi di asigna trahadornan social di KPA (Slachtofferhulp) tambe na e caso pa yuda begeleid un di e partidonan.

KPA ta tratando e caso mas aleu y door di esey no por duna mas informacion na e momento aki.

Nota di redaccion awe24.com
Ta pesey a bira tempo pa gobierno y parlamentarionan cambia e leynan anticua cual ta duna e malhechor mas forza y ta margina e victimanan nan derecho. Si esaki lo sigui ni polis lo por bay atende cu nan mas.