Den un atraco victima a ser dispara den pecho na momento di a bay deposita placa na Aruba Bank

Dialuna anochi durante cu polis y ambulans tabata atendiendo un accidente banda di Manuelito's Bar a yega un auto cu e chofer gritando pa auxilio ya cu nan a tira un colega di dje durante un atraco den Caya G.F. Croes net na momento cu e kier a deposita placa di e negoshi na e night deposit box na Aruba Bank. Den e atraco aki un persona apariencia di choller lo a atraca e victima y a dispara un tiro memey di su pecho heridando e y despues di a kita e saco di placa a core bay y desaparece. Djey nan a subi auto pa bay hospital pero debi cu e caminda ta sera a para pidi auxilio na e sitio ey mes.Na yegada di e ambulans nan a atende y a transporte mesora pa hospital. Atraco team a ser avisa y tin e caso aki bao investigacion.

Relato policial di e susedido:
Pa mas o menos 7 or y 45, un patrouille di Oranjestad cu ta bezig cu un accidente dilanti di Manuelito's, dilanti misa di Playa, ta wordo acerca pa un auto shinishi. E chauffeur ta bisa nan cu e tin un amigo herida den auto. Polis ta bin topa en berdad cu e homber S.S. nasi na India di 29 aña cu tabatin un herida den su pecho cu tabata sangra bastante.
Segun e chauffeur nan a bay hasi un deposito di placa na Aruba Bank den Caya Betico ora nan a wordo atraca pa un hende homber full na preto y arma cu un arma di candela. E vcitima lo a resisti y purba bringa cu e atracador y lo a wordo tira den pecho. Ambulans a bin rapidamente na e sitio y a transporta e victima cu urgencia pa hospital. Su condicion te na e momentonan aki ta hopi debil y ta teme pa su bida.
Atraco team tin e investigacion na e sitio.
A bay cu un suma di placa basta grandi.