Segun Andin Bikker (PDR): Parce cu no tin Minister di Husticia na Aruba Luz ta cendi pero no tin hende na cas

Ta parce cu na Aruba no tin Minister di Husticia. Pueblo ta wordo atraca practicamente tur dia violentamente den nan cas of negoshi, autonan ta wordo horta y ta wordo haya bek tur pluma of kima, pero e Minister di Husticia ta keda keto haci comosifuera tur cos ta bon. Y no obstante cu fraccion di PDR a puntra pe, e Minister no a bin dilanti cu un plan di maneho ni di emergencia pa combati criminalidad. E Minister parce no tin nocion di prioridad tampoco, enves di pone mas polis riba caya cu e accento pa duna un sentido di seguridad na Pueblo, ta concentra riba pone control di trafico tur skina, mientras cu atracadornan mes ta fiesta den dia cla. Ta parce cu ciudadanonan na caminda pa denuncia un robo tin mas chens di haya un boet paso nan a lubida di bisti seatbelt, cu di haya nan pertencianan bek. Unda e prioridad ta: parti boet pa infraccionan chikito pa jena caha di Gobierno of ofrece seguridad y combati criminalidad pisa? PDR ta bay bolbe pidi un reunion publico riba e tema di combatimento di criminalidad wak si e Minister cu ta supose di ta encarga cu Husticia, su Mahestad, ta bin responsabilisa su mes na Parlamento y asina Aruba tambe lo conoce un sorto di Prinsjesdag. Pueblo en todo caso ta harta cu nada ta wordo haci di parti di Gobierno riba e tema, Gobierno ta ignorando un di e temanan di preocupacion mas grandi den nos pais. Ta con Gobierno kier pa nos Pueblo biba y prospera si no tin seguridad den cas, negoshi of riba caya?
Tin hasta informacion clave cu cierto grupo di comerciante a contrata expertonan Hulandes pa bin cu un plan di proteccion special pa nan negoshinan, paso nan ta sinti cu nan no por laga esaki mas den man di Gobierno. Pues e situacion ta alarmante y algo mester wordo haci.