Remetido di Save Alto Vista: KICO TA E BALOR DI ALTO VISTA ?

Diarason mainta, Sept 19, 2012, tur parlamentario a ricibi un invitashon via email pa un reunion chikito, mesun dia, cu 3 punto riba agenda. Save Alto Vista tin un copia di e mail aki ariba su FaceBook Page.

Henter fraccion di AVP a atende y solamente 1 parlamentario di oposicion. A agrega e projecto di Urirama na ultimo ora.
Den e reunion aki fraccion di AVP a dicidi pa considera solamente e aspecto di salud pa proyecto Urirama y busca un opinion serca un instancia Hulandes scohi pa nan mes pa toets e parti aki den e MER traha caba y a cancela e debate publico den Parlemento riba Sept 24, 2012.

SaveAltoVista ta senyala cu e procedemento aki di fraccion di AVP, ta di bira lomba pa diferente punto cardinal di preocupacion.

Pa grupo SaveAltovista e proteccion y conservacion di e recurso di peregrino di Kapel Alto Vista y su naturalesa sereno ta primordial. No tin mester di ni 1 MER pa studia y evalua esaki, y ningun otro estudio, sigur hasi pa hulandesnan cu no conoce nos cultura y custumbernan. No tin mester di tin ningun otro criterio mes mas pa desaproba sacrificio di e recurso spiritual aki, pa Projecto Winturbine Urirama.

Pone 10 turbina industrial di biento den naturalesa sereno di Alto Vista Kapel ta destrui e esencia di Aruba su unico sitio di perigrino spiritual y Aruba su homenahe na e prome misa den historia di nos pais (originalmente construi na 1752 pa indianan).

E ta un lugar di contemplacion spiritual pa creyente y no creyente, pueblo di Aruba y turista. E ta awendia e UNICO lugar di contemplacion spiritual na Aruba den un naturalesa sereno y autentico Arubano. Den un naturalesa protehi den LB ROP (Land Besluit Ruimte Ordering 2009) cu e gobierno aki mes a aproba.
Ta hustamente e combinacion di e naturalesa den cual e kapel ta situa ta loke ta hasi e sitio aki di peregrinacion valoroso y unico.

Esaki no ta kita afor cu otro preocupacionnan di otro gruponan contra e projecto WT Urirama no ta valido pa consideracion.

E maniobra strategico politico dudoso cu fraccion AVP a hasi riba Sept 19, 2012, pa bypass un debate publico den parlamento planea, y pa procede di basa nan decision final solamente riba un advies adicional for di Hulanda riba efecto riba salud di habitante den barionan, ta bira lomba pa un contemplacion responsabel profundo di TUR preocupacion valido di e projecto.

SaveAltoVista ta un grupo di usario di Kapel Alto Vista y su naturalesa di TUR color politico. SaveAltoVista no tin ningun incentivo politico. SaveAltoVista ta spera cu Presidente di Parlamento y fraccion di AVP TA bai mantene nan mes na reglanan di bon gobernacion y debate publico. Den esaki considera y evalua TUR punto di preocupacion, incluyendo:
valor cultural, historico y turistico; medio ambiente, conhunto cu un berdadero estudio completo di parha, como ta mira nos shoko ta biba einan; aspectonan tecnico, factibilidad financiero pa land y pueblo. Esaki y incluso preguntanan cu mester wordo contesta pa Minister Benny Zievinger cu a keda pendiente den un reunion publico di parlamento, presedi pa Paul Croes, riba un proximo fecha cu lo wordo anuncia pronto.

Alto Vista tin asina hopi balor, cu e NO por wordo balora den cifras! Ban Salba Alto Vista!

Mail na: savealtovista@gmail.com