Acto di buena fe a bin termina den un caso di atraco arma cu maltrato brutal y ladronicia

Dialuna madruga a drenta informe di un caso di atraco y maltrato na Emmastraat mientras tin un victima herida na Circle K, mesora a dirigi e patruya na Circle K. Na yegada di e patruya nan a bin encontra cu e victima di atraco y maltrato serio a core pa su bida yega te na Circle K. Esaki despues di a bay haci un acto di buena fe pa duna un hende lift unda cu na dado momento esun cu a tuma lift a saca un cuchiu pone na garganta di e chofer bisando e cu ta un atraco. E chofer a dune su pertenencia y despues a forse baha for di auto unda a sigui un maltrato pisa unda e victima a cay abao y tabata sangrando, asina e atracador a logra kita mas pertenencia for di e victima y despues e atracador a subi e auto pa busca mas pertenencia y bandona e sitio cu e auto di e victima. eynan e victima a haya chance pa lanta y core bay pidi auxilio na Circle K. E victima tabata tin bastante sla na su curpa, na yegada di ambulans nan a atende e victima y a transporte cu urgencia pa hospital. Mientrastanto a drenta informe cu tin un vehiculo cu sla na dje cu a ser laga atras na Driemasterstraat, ora cu polisnan a bay wak a bin resulta di ta e auto di e victima di atraco. Atraco team y e departamento di investigacion tecnico a bay na e sitio y tin e caso bao investigacion.