Choller a drenta cu cuchiu den man y a comete atraco na Valero Boulevard

Diahuebs merdia a drenta informe di un atraco arma na Valero Palm Beach, mesora a dirigi varios unidad na e cercania. Na yegada di e patruya a bin compronde cu no tin nada particular pero na Central di polis ta afirma di a ricibi un fax cu ta indica atraco. ora cu a bay check mas aleu a bin descubri cu enberdad un atraco a tuma lugar pero na Valero Boulevard. Mesora patruyanan a bay na e sitio y a bin compronde cu ta trata di un atraco arma unda un persona parecido na un choller a drenta cu cuchiu den man a comete e atraco. Ta un oersona cu tabata den oficina hunto cu e supervisor y a nota cu un hende cu cuchiu den man ta zwaai cometiendo atraco. Eynan mesora a e supervisor a manda un fax indicando e atraco tumando lugar. Atraco team a ser avisa di e caso aki y mesora a presenta pa tuma copia di e grabacion di e atraco pa asina logra captura e sospechoso.