Booshi Wever: RETIRO DI PAUL CROES TA MAS CU URGENTE!!!!!

213 dia pasa , 16 di mei 2017 13:59
Seccion: politica
foto di Booshi Wever: RETIRO DI PAUL CROES TA MAS CU URGENTE!!!!!
Boogaard Assurantiën - P'abo Ta Bon Segura!
Megavit - Lejuez Brothers International

SOLUCION PA CASO PAUL CROES NA CAMINDA? P’ESEY E RECIBIMENTO TRIUNFAL NA SAN NICOLAS? RETIRO DI PAUL CROES TA MAS CU URGENTE!!!!!
 
Entrada di Paul Croes diasabra ultimo na e celebracion miyonario di Mike de Meza na un manera triunfante ta trece hopi pregunta cerca partido UPP. Manera un “hereo” e minister riba non-actief, cu ta wordo sospecha pa actonan incorecto y hasta ilicito, a wordo ricibi dor di partidarionan, particularmente pa e dirigencia di partido bou liderasgo di Mike Eman. Nos no kier huzga e persona en cuestion, pero nos consenshi y nos racionalidad estatal ta bisa nos cu como un sospechoso ora bo ta minister, lo bo mester a tuma bo retiro. Awor ta bin cu un "landsbesluit" pa acomoda e situacion di e minister encuestion, mientras cu den fraccion di AVP lo tin sentimentonan mixto pa loke ta e situacion di Paul Croes. Rene Herde a bay asina leu di bisa cu si tabata su persona, e lo a tuma retiro como minister. Pero UPP ta kere, cu na momento aki e minister ta mustra di no tin consenshi. Parlamento mester ta e consenshi di pueblo, y den su nomber Rene Herde como parlamentario mester a duna retiro na Paul Croes. Pero parce nan tur a perde gevoel y acepta cu mal gobernacion ta normal. Un decadencia total pa loke ta ensera nos estado di derecho.

E forma con Paul Croes a wordo ricibi, despues di casi dos luna, na un actividad di AVP ta pone hopi pregunta bin ariba. Lo bay tin un solucion pa Paul Croes, banda di e "landsbesluit" cu ta wordo prepara? A keda regla cu Hulanda cu lo no persigui Paul Croes mas? Lo bin medida contra esnan den Ministerio Publico cu a tribi di haci e "inval" den cas di e minister? Lo seponeer e caso? Ta berdad cu e persona cu ta traha den FIOT di Aruba lo por a haya un "waarschuwing" di gobierno pasobra ela coopera? E persona encuestion lo ta bandonando su puesto? Officier van Justitie tambe lo bay sinti esaki y na unda cu lo por bin un remplazo? Lo e wordo manda bek Hulanda? Y lo bini uno nobo den su lugar cu ta bin cu un otro

mensahe? Minister Dowers ta encarga pa regla e asuntonan aki cu Hulanda? Ta bay haci mescos cu den pasado unda a exonera ministernan cu a comete desfalco? Ministernan cu a keda proba cu nan a comete corupcion? Mike Eman ta prefera pa regla esaki mirando cu tin mas minister envolvi, sin conta e ex-minister cu tambe a firma ontheffing, pa asina hende di afo no tin nodi pasa e "arbeidsmarkttoets"? Cu hustamente ta poni pa defende y proteha nos yiunan di tera. Di e forma aki ta stroba nos yiunan di tera haya trabou.

UPP sigur ta desaproba e actitud di tanto Paul Croes cu a tribi di sali di e forma aki for di su casca, pero tambe e actitud di AVP pa e forma cu a dicidi di ricibi Paul Croes ta wordo cuestiona. Esaki nos ta considera como un berguenza nacional. Paul Croes pa colmo no ta “zomaar iemand”. E ta un minister "in funktie" di pais Aruba.
Despues cu seponeer e caso, kico ta resta di nos estado di derecho? Cu otro palabra ta midi cu dos midi aki? Dicon den caso p.e. di un polis, si ta detene e persona aki, e ta bay cera y despues perde su trabou, pasobra el a sjoemel cu bonnan di cuminda? Anto un minister cu a firma ontheffing cu negatief advies, miles manera ta wordo bisa, contra di maneho y procedura, sin papia ainda si el a ricibi placa ta actua normal manera nada no a pasa.
Awor ta bin acerca cu awe Ministerio Publico ta bay over na haci e prome detencion. E pregunta cu esaki ta pa “Barbertje moet hangen”? Ta bay colga chikitonan pa fechoria di e grandinan. Tin mas minister envolvi? Cu e accion aki no ta keda duda cu Paul Croes mester tuma su retiro di immediato. Y si no a tume ainda, UPP ta pidi pa Rene Herde, parlamentario di e pais Aruba, mester yama un reunion y pone esaki na discusion. E hecho cu AVP ta ricibi Paul Croes na grandi na San Nicolas, ta haci cu como partido nan tambe ta full fout.

Pueblo di Aruba no mester acepta esaki. Pueblo mester realisa cu e unico salbacion ta introduci reglanan estricto di Good Governance. Y no simplemente bisa cu ta integridad ta suficiente of regla financiamento di campaña politico. Esaki ta partinan minimo di loke mester. Pero reglanan di Good Governance ta bay mas leu. E componentenan ta hustamente pa defende estado di derecho cu nos como ciudadanonan kier kere aden. Ora no ta cumpli cu reglanan di bon gobernacion, nos estado di derecho ta na peliger.
Un estado di derecho ta un estado na unda cu e poder di gobierno ta wordo mara dor di su constitucionalidad. E constitucionalidad ta mas cu un sistema di leynan. Na momento cu un gobierno of un funcionario ta haci mal uso of abuso di e poder cu e tin, pa fix cosnan, nos por papia cu ya no tin un estado di derecho. Of por bisa mas bien cu tin un falta di estado di derecho den un estado asina. Y esaki ta e direccion cu nos pais ta bayendo aden, y cu consentimento di gobierno Hulandes y di nos Parlamento. Un direccion de facto di insconstitucionalidad, cu si nos pueblo no pare awor aki, lo por causa cu al final nos lo perde mas di nos autonomia. Pueblo di Aruba, palabra ta den bo man!

Lider di Partido UPP
Booshi Wever
16 mei 2017

Upsize, Earn Points & Win with Wendy's!
ORGINAL SWAT