MEP nunca a kita e derechonan di pensionado, cobrado di onderstand y contractantnan

154 dia pasa , 17 di mei 2017 15:05
Seccion: politica
foto di MEP nunca a kita e derechonan di pensionado, cobrado di onderstand y contractantnan
Boogaard Assurantiën - P'abo Ta Bon Segura!
Megavit - Lejuez Brothers International

Campaña di calumnia di AVP a cuminsa! MEP nunca a kita e derechonan di pensionado, cobrado di onderstand y contractantnan

Durante e ultimo dianan aki partido AVP den su ansha y desesperacion a cuminsa cu un campaña bao man pero sushi caminda nan kier manipula mente di pueblo, bisando cu na momento cu MEP drenta gobierno nos partido lo bay baha e suma di pensioen di viehez, baha e suma di onderstand y kita trahadornan cu contract den gobierno. Sinembargo e realidad ta cu den pasado semper e gobiernonan social democrata di MEP a respeta tur e derechonan di nos pensionadonan, cobradonan di onderstand y contractantnan, locual nos no por bisa di e gobiernonan di AVP.

1. Pensionadonan. Durante e periodo di 8 aña di Gabinete Oduber e suma di pensioen di viehez di SVB a ser aumenta substancialmente, caminda e pensionadonan casa a conoce un aumento di 264 florin, mientras cu durante e ultimo 8 añanan di Gabinete Eman e pensionadonan casa a haya un aumento di solamente 84 florin. Pa e pensionadonan soltero e aumento di pensioen bao di gobierno di MEP tabata 157 florin, mientras cu bao gobierno di AVP esaki tabata un miserabel 50 florin den 8 aña.
Alavez mester recorda un y tur cu ta e gobierno di AVP a mutila e pensionadonan di gobierno (APFA), caminda nan a aumenta di e edad di pensioen te 65 aña, a introduci Franchise, Middelloonregeling, a reduci e Duurtetoeslag, a baha e porcentahe di aculumacion di pensioen, a kita e Gelijkbedrag y a kita e Bashi Premie di e pensionadonan y e ambtenaarnan cu den futuro lo bay cu pensioen.

2. Cobradonan di onderstand. Mester enfatisa cu tabata durante Bestuurscollege di MEP y bao maneho di diputado Grace Bareño (dfm) onderstand no a ser considera mas un fabor, pero a bira un derecho pa tur esnan den necesidad y cu no por haci wega politico cu esaki. Alavez semper durante tur gobernacion di MEP e suma di onderstand, mescos cu ta e caso cu salario minimo y pensioen di viehez a ser aumenta periodicamente y esaki segun e aumento di costo di bida.

3. Contractantnan den gobierno. E unico partido cu semper a bula cabez di esnan cu ta traha como contractant di gobierno, ta partido AVP. No mester lubida con Gabinete Eman na 2014, pa complace CAFT y Hulanda, a introduci e medida di “Halvering arbeidscontracten”. Nos tur por corda ainda con durante eleccion 2013 Gabinete Eman a emplea un gran cantidad di contractant den gobierno, e.o. na Departamento di Finansa, CBS, pero cu ni algun luna despues di eleccion e mesun Gabinete Eman aki a kita tur e contractantnan aki for di trabao. Hopi di e trahadornan aki tabata votadornan di AVP y tabata AVP mes cu a kita pan for di boca di e yiunan di e contractantnan aki, locual tabata algo sumamente doloroso.

Asina pues un y tur mes por mira cu durante gobernacionnan di MEP semper nos a goberna respetando e derechonan di tur pensionado, cobrado di onderstand y contractantnan. Pero ta comprendibel e campaña di calumnia di AVP, ya cu den nan desesperacion nan kier pinta MEP malo den comunidad y p’asina nan por halza nan mes riba custia di nos partido. Pero e pueblo inteligente lo sa un biaha mas di huzga entre bondad y maldad, esta entre MEP y AVP!

ORGINAL SWAT
You Call, We Haul
ORGINAL SWAT