DEN DOMINO, TEAM 99 A BODY SLAM BALASHI KNIGHTS!!

41 dia pasa , 15 di mei 2018 09:34
Seccion: deporte
foto di DEN DOMINO, TEAM 99 A BODY SLAM BALASHI KNIGHTS!!
Boogaard Assurantiën - P'abo Ta Bon Segura!
foto di DEN DOMINO, TEAM 99 A BODY SLAM BALASHI KNIGHTS!!foto di DEN DOMINO, TEAM 99 A BODY SLAM BALASHI KNIGHTS!!foto di DEN DOMINO, TEAM 99 A BODY SLAM BALASHI KNIGHTS!!
Megavit - Lejuez Brothers International

Kudawecha/Calabas Square Garden – Shonnan ta manera nan sa bisa na Hulanda, "het kan verkeren"! Diabierna ultimo e "ridder" nan di Balashi a haya nan mes den un sorpresa estilo pelicula ora nan a enfrenta e mercenarionan di 99 Bar & Restaurant na e unico Domino Square Garden na mundo! Na cuminsamento di wega tabata parse cu Balashi Knights lo bay duna Team 99 "Hell on Earth"! Den estilo relampago Balashi Knights ta habri anochi cu intencion di mustra ken ta "Boss" aki. E prome di Team 99 cu ta haya un "wake up call" durisimo ta e teror di Camay, "Kid Cascarabia", kende ta exihi cu ta cu "Heyden" so e ta hunga, ya cu tur otro miembro di Team 99 ta di clase inferior! Den su prome wega Kid Cascarabia ta haya un sapato blanco blanco! Prome cu por frega wowo, ya na otro mesa e famoso "Jo Sera Wega" tambe ta habri anochi hayando un blanco, y na otro mesa e conosido "Luquitas" tambe ta haya "clean board"! Balashi Knights ta habri e anochi sensacionalmente pasando 3 clean board tras di otro!! Pa tira un tiki mas gasolin ariba candela, "Kid Cascarabia" ta pas 4 biaha tras di otro cu piedra den man, y ora reclamo pisa di integrante di Balashi cay, ata e teror di Camay su fuse ta bula tambe y ta cla pa bolter mesa! Cos ta hot shonnan y ta danki na e diplomacia impecable di Dr. Han cu paz ta reina atrobe!
Pero, e anochi ta bay ta largo y careda di bina no a caba ainda! Esnan cu a kere cu Team 99 ya ta "down", a keda asombra con mescos cu luchado di wrestling, Team 99 ta bula lanta ariba prome cu referee bati lona 3 biaha! Luchando piedra pa piedra, Team 99 ta gatia bin bek y logra empata na 10-10 y ta drenta bou gritonan euforico half time cu score di 11-10 na nan fabor! "Heeeeroooo" e grito di Team 99 ta rezona den un 99 Bar & Restaurant pata pata di fanatico di domino! Akinan capitan di Balashi Knights ta yama reunion urgente pafo pa elabora ariba plan B of kisas plan C, pasobra e pan grandi cu nan a kere nan lo haya e anochi aki a resulta di ta duro pa kauw y guli!!
Den di dos buelta, e ekipo di mercenario di 99 Bar & Restaurant ta sera cabes mas ainda y ta pone preshon enorme ariba Balashi, kendenan den nan nervio a cuminsa bruha señal mahos! Te asta bou mesa nan ta purba schop otro pa pasa seña, pero e niña nan di Team 99 ta "ongrijpbaar" e anochi aki! Cu incredulidad y euforia, fanaticada di Team 99 ta wak con nan ta pika dilanti cu 16-15! "No puede ser!", bo ta tende e "chicas" nan ta sclama ora cu Team 99 ta sigi avansa te 20-15! Gritonan "X-Rated" ta cay ora Team 99 sencasionalmente ta gana cu score di 21-15!! Hopi di Balashi Knights a core bandona luga manera fruminga cu a haya holo di flit!! Un anochi historico pa Team 99!! Pero...shonnan keda pendiente! Ya caba whatsapp a cay cu Balashi Knights kier revancha! E cos aki ta bay haya rabo! Un palabra grandi di 99 Bar & Restaurant ta bay pa nan fanatico y hungadonan, y tambe pa Romar Trading kende un biaha mas a sa di sponsor un tremendo evento!

mas foto di DEN DOMINO, TEAM 99 A BODY SLAM BALASHI KNIGHTS!!mas foto di DEN DOMINO, TEAM 99 A BODY SLAM BALASHI KNIGHTS!!mas foto di DEN DOMINO, TEAM 99 A BODY SLAM BALASHI KNIGHTS!!
Maaza - Coconut water and Mango
ORGINAL SWAT