Booshi Wever UPP: E GUERA ENTRE SINDICATONAN TA CONTINUA SIN TA TENE NA CUENTA INTERES DI E PUEBLO!

102 dia pasa , 11 di juli 2018 13:09
Seccion: politica
foto di Booshi Wever UPP: E GUERA ENTRE SINDICATONAN TA CONTINUA SIN TA TENE NA CUENTA INTERES DI E PUEBLO!
Boogaard Assurantiën - P'abo Ta Bon Segura!
Megavit - Lejuez Brothers International

Den e ultimo dianan nos por a tuma nota di un bay bin di declaracionnan di diferente sindicatonan riba e.o. e medida desvastador cu Otmar cs kier implementa cu consentimento di gabinete Wever- Croes y cu aprobacion di e asina yama Stempelparlement. Den e caso aki nos kier a referi na 3 sindicato cu kier a trata di hustifica e medida cruel cu Otmar cs lo bay impone riba nos pueblo na januari 2019.

Cu e medida inhumano aki, Otmar cs a pone e ser humano un banda y a scohe pa pone e interes di nan sponsornan central. Tristo aki ta cu tanto FTA, Seppa y STA a bay di acuerdo cu e medida aki. Sinembargo den medionan di comunicacion nos por a tuma nota cu tur tres kier tira culpa riba otro, lubidando cu ora mustra dede riba un otro tin tres dede ta mustra riba bo mes.

Den un programa radial nos por a tende e vocero di FTA bisa cu nan no a studia e materia bon y cu nan no a firma nada. Pues un tipo di tira piedra sconde man. Di un otro banda nos ta haya cu tanto STA como Seppa a start un guera pa wak ta cua di nan dos lo haya mas empleadonan di Serlimar como miembro. Nos por a scucha e representante di Seppa yudá pa un señora cu tabata grita manera alma malo, segun sr. Diego de Cuba, hustifica e accion di trahadornan di Serlimar pa motibo cu lo tabata tin un rumor (redo) cu e fraccion di MEP lo a bin cu un mocion pa cambia e ley di 2005. E cambio di ley, segun e rumor, supuestamente lo a bay exonera esnan cu ta paga pa e servicio di otro compania priva, pa paga pa e medida di Otmar cs.

Nos a kere cu Seppa a strike pa evita e medida aki y tambe pa para e corupcion y e malgastamento di placa na Serlimar, pero nada di esey tabata e motibo. Seppa a ignora loke ta pasando den Serlimar y a bisa cu nan ta di acuerdo cu e medida di Otmar cs.

Den un entrevista e presidente di STA kier hasi como sifuera cu e mes no ta participe den e redashi ey. Sinembargo den un programa radial nos por a scucha e voz di sr. Diego de Cuba na unda, na manera hopi cla, a bisa cu e miembronan di fraccion di MEP lo kier a presenta un mocion cu e meta pa haci posibel e exoneracion ariba menciona. Loke ta remarkabel ta e hecho cu e presidente di STA a insinua cu probablemente algun miembronan di MEP lo a haya placa

for di Ecotec pa core campaña. Si esaki no ta redo, kico ta redo anto? Straño ta cu ningun hende di MEP a contradeci esaki tampoco.

STA parce di tampoco a haya necesario pa para e corupcion, fixed-bidding, tumamento sin fin di hende den servicio, etc etc y simpelmente bay na Amen di Otmar cs. Tristo ta cu un di e argumento cu ela usa ta cu introduccion di e medida aki, porfin e ley di 2005, manera eta bisa den e grabacion e ley di Booshi, ta wordo aplica manera mester ta.

Wel shon de Cuba, desde "day one" e ley aki a wordo aplica al pie de la letra. Pakico? Pasobra MEP di e tempo ey a pone e ser humano central y a dicidi como gobierno, ya cu e pueblo por medio di e.o. inkomstenbelasting ta aportando completamente caba pa e operacion di Serlimar, pa absorba e gastonan cu e operacion aki ta trece cune. Y mi no por keda sin menciona cu e tempo ey e sindicato Seppa tabata vocifera esaki tambe.

Ta despues cu na 2015, durante e gobernacion di AVPOR, a hala e ser humano un banda y a cuminsa cobra y a exonera esnan cu ta paga otro companianan priva pa recohemento. E tempo ey mi no a tende shon de Cuba ni Seppa grita nada. Unda boso tabata? Awe cu corupcion ta na ordo di dia den Serlimar kier bin hunga "tough guy"!!!

Ta increibel cu sindicatonan ta pone interes propio prome cu e interes di e pueblo y e compania estatal . Y esun cu lo sali gana ta e miembronan di e Kartel cu lo bai sigui yena nan saco por medio di e introduccion di e prome set di "Kartelheffing"! No mester lubida cu e "Kartelheffing" aki ta pa cubri e gastonan actual, esaki lo no bay cubri e gastonan cu mester bin ainda pa e compromisonan cu Otmar a haci caba y lo bay haci ainda cu e tantisimo corupcion y mal gobernacion cu tur dia ta ser haci.

Despues di introduccion di e ley na 2005, tabata tin un Hunta di Supervision na Serlimar cu tabata sa di haci nan trabou na bienestar di Aruba, di e trahadornan y di e compania. Y aki mi mester reconoce e trabou di e representante di Seppa den e hunta. Unda e voz di e sindicatonan ta awor cu tur e corupcionnan aki ta kedando?

Ora cu cachonan ta bringa pa un weso esun na banda ta bay cune y den e caso aki ta e KARTEL lo ta esun cu lo bay cu e weso.

Booshi Wever

Lider partido UPP

11 juli 2018

ORGINAL SWAT
Maaza - Mango, Fruitpunch, Passionfruit
ORGINAL SWAT