BCA ta publica su vision pa 2020 den e plan Bela Yen

74 dia pasa , 9 di augustus 2018 13:58
Seccion: commercial
foto di BCA ta publica su vision pa 2020 den e plan Bela Yen
Boogaard Assurantiën - P'abo Ta Bon Segura!
Smart Systems Aruba - Bishita nos page pa mas informacion

Banco Central di Aruba (BCA) a publica su plan multi-anual, esta “Bela Yen: Nos Plan Strategico 2016-2020” den cual BCA ta expone su vision pa 2020. E plan aki tabata solamente pa uzo interno, pero a dicidi di haci esaki tambe obtenibel riba e website di BCA pa asina informa comunidad di Aruba tocante e metanan di BCA pa 2020. E plan ta basa riba e tareanan principal di BCA manera e mantencion di e stabilidad di nos florin, e supervision riba e sistema financiero, y e emision di biyete y moneda di Florin.
“Bela Yen” ta un dicho na Papiamento cu ta significa full speed pa dilanti. Esey sigur ta visibel den e ambicionnan cu CBA a propone pa su mes pa e periodo actual te cu 2020, cualnan ta: ta un banco central prominente den region, haci su trabou na un manera eficiente y orienta riba resultado, y ta un organisacion atractivo pa talento excepcional. E ambicionnan multi-anual aki ta e punto di partida pa planifica e maneho anual y BCA ta procura cu tur su departamentonan ta alinea nan mes cu nan propio metanan den e cuadro di Bela Yen.
Un ehemplo concreto cu ta resalta den e plan aki ta e deseo pa modernisa e sistema di ‘clearing’ actual. E prome paso pa cu esaki ta e lansamento di e sistema nobo di pago instantaneo na comienso di otro aña. Den cuadro di educacion y informacion financiero, BCA lo disponi den futuro di un museo y centro di bishita. E creacion di un departamento di Stabilidad Financiero y alabes un organo di maneho encarga cu promove stabilidad financiero ta un meta concreto cu ta sumamente importante no solamente pa BCA pero pa Aruba henter.​
“Como nos vision ta pa ta un banco central prominente den region na 2020, sosteni door di un cultura di integridad, excelencia y innovacion, ta importante pa henter nos ekipo sa con cada ken su trabou ta contribui na e meta aki. Cu e plan aki como fundeshi di nos trabou diario, nos no ta perde bista di ‘the big picture’’ y nos tarea pa Aruba”, ta comenta Presidente di BCA Jane Semeleer.
A presenta Bela Yen den e aña cu BCA a celebra su di trinta aniversario, esta 2016. Durante e añanan cu a transcuri, e ambiente den cual BCA a opera a bira mas dinamico y compleho. Pero danki na BCA su maneho monetario e balor di e florin a keda stabiel y ta un simbolo di orguyo y identidad nacional. Banda di esey, BCA a promove un desaroyo sano y integro di sector financiero, cual ta tambe fundamental pa un economia creciente y vibrante.

Cumpra bo Lotto Online - Click to Play Now
ORGINAL SWAT