Dr. Dellanire Maduro (Medico General) ta elabora encuanto ARU-BIG

37 dia pasa , 7 di november 2018 22:34
Seccion: salud
foto di Dr. Dellanire Maduro (Medico General) ta elabora encuanto ARU-BIG
Boogaard Assurantiën - P'abo Ta Bon Segura!
foto di Dr. Dellanire Maduro (Medico General) ta elabora encuanto ARU-BIG
Smart Systems Aruba - Bishita nos page pa mas informacion

ARU-BIG parti 1
Ultimamente e tema di Aru-Big ta un tema di discucion, tin algun confusion innecesario relaciona cu esaki, unda mi ta haya di suma importancia pa trece claridad.
Debi cu e tema aki ta uno extenso mi lo dividi e articulo.
Mayoria pais na mundo tin leynan unda ta wordo discribi e reglanan cu un profesional di salud mester cumpli pa asina por eherce su profesion.
Cada pais ta registra su profesionalanan pa asina por distingui cua ta e profesional capacita, califica, capaz pa eherce su profesion. Tur profesional registra ta haya un number/codigo personal unico. Na momento cu kier busca informacion di e medico por realisa esaki via e nomber di e profesional of su codigo medico.
Cada pais tambe tin nan ley y reglanan cu ta defini con un profesional di salud cu un titulo/diploma internacional ta wordo reconoci. Cada pais ta determina e rekisitonan, examen entre otro cu e profesional lo mester realisa pa por wordo reconoci.
Actualmente Aruba su leynan ta permiti mediconan gradua na Hulanda of registra na Hulanda eherce nan trabou, si un profesional medico local of internacional a obtene su titulo na otro pais cu no ta Hulanda of no ta registra na Hulanda esaki no ta permiti pa ley pa eherce su profesion na Aruba. Den e casonan aki e dunado di trabou por ehempel hospital ta realisa un peticion na minister pa permiti e medico traha atraves di firma un ‘MB’.
MB’s
‘MB’ Ministeriele Beschikking ta un ley cu ta permiti den e caso aki e Minster di Salubridad Publico pa tuma e decision di duna un excepcion na mediconan pa eherce nan trabou, apesar cu nan no ta permiti pa ehrece nan trabou segun e ley.
Pa hopi aña caba ministernan di salubridad anterior a haya nan mes confronta cu e situacion aki. E dunado di trabou por ehempel Hospital, IMSAN ta manda e peticion pa DVG (departamente di salubridad publico) y DVG ta revisa e peticion y ta manda esaki pa e minister firma.
En realidad e ‘MB’ ta existi pa por duna excepcion na momento cu tin un escasez of demanda di atencion medico, pa asina e pashentnan por haya e servicio di e profesional. E excepcion aki ta wordo duna pa un periodo defini, sea pa par di luna of 1 aña den mayoria di e casonan. Dus e medico no ta permanente (no ta den vastdienst), e medico por eherce solamente pa e tempo stipula pa e ‘MB’. Esaki ta sucede debi cu e ley no ta duna espacio pa e mediconan cu no a studia na Hulanda of cu no tin e registro medico “BIG”.
Esaki ta haci cu e mediconan aki ta depende tur aña di e MB cu e minister mester firma, cual ta haci e proceso aki uno ineficiente y discriminantorio. Cual esaki ta perhudica e servicio cu e pashent mester ricibi.

Comision ARU-BIG

Februari 2018 minister di Turismo, salubridad publico y deporte a forma un comision pa e implementacion di ARU-BIG cu e meta pa mehora nos calidad di cuido medico. Manera ta indica den e acuerdo di gobernacion “Hunto pa Aruba” e accion aki ta di suma importancia pa crea posibilidadnan pa mas profesionalnan (medico, enfermero, specialista etc.) de area di salud por eherce nan funcion. E comision a haya e tarea di duna recomedacion y sosten na minister pa realisa esaki. Unda ta haci enfasis pa crea posibilidad pa nos yui di tera cu e studia den regio (paisnan latino) y Hulanda por bin eherce nan profesion na Aruba. Diferente “stakeholders” relaciona cu area di salud y ministerionan ta forma parti di e comision aki, por ehempel SVB, DVG, Hospital (HOH), Vereneging di dokter di cas (HAVA), asociacion di specialista (ASHA), AZV, ministerio di salubridad, minsterio di educacion, minister di husticia entre otro. Mi persona a haya e oportunidad pa forma parti di e comision.
Den e ley Aru-Big tin describi cuater forma cu un profesional di salud den de caso aki un medico por wordo reconoci y asina eherce su trabou.
E prome forma ta atraves di un registro di salud di otro pais cu actualmente den e ley tin solamente dos registro cual ta e registro di Hulanda cu yama “BIG”-( Beroepen in de Individuele Gezondheidzorg) y di Canada “CANMED” cu ta un “quality framework” cu en realidad no ta un registro. E di dos ta via un organo di acreditacion, e di tres a traves di un Carrera local reconoci door di departamento di enseñansa y por ultimo atraves di un instituto di calidad cu actualmente na Aruba no tin un ainda.
E prome opcion pa reconoce otro registro medico di otro pais manera registro medico di Colombia cu ta “Rethus” y di Costa rica “Colegio de Medicos y Cirujanos” a wordo discuti durante reunionan di e comision, unda a dicidi pa garantisa calidad cu e miho opcion ta pa reconoce a base di nan organo di acreditacion. Esaki ta un di e consehonan cu ministerio a tuma na cuenta di e ‘stakeholders’.
Organo di Acreditacion
Organo di acreditacion ta un instancia cu ta determina si un carrera (opleiding) ta cumpli cu criterionan y standard specifico di calidad. E instancia ta duna reconocimente official di calidad y di mehoracion continuo. Cu esaki un por ehemple un universidad por demostra cu nan carrera ta cumpli cu e criterionan y ta reconoci door di e instancia como tal.
E organo di acreditacion di Colombia ta “CNA” - Consejo Nacional de Acreditacion.

Den caso di Costa Rica “SINAES” ta nan Sistema Nacional di Acreditacion di Educacion Superior. SINAES ta evalua mas di 170 criterio.
Nan proceso di acreditacion ta consisti di e siguiente pasonan: 1. Autoevaluacion: integranten di e Carrera ta haci un revision di e programa di estudio, infraestructura y calidad di e formacion, entre otro. Durancion di 6 luna pa 1 aña
2. Evaluacion externo: un experto nacional y dos internacional ta evalua e calidad di e formacion y duna recomendacionan (report) pa mehora Duracion di 1 siman.
3. Mehoracion continuo: e carrera ta compromete su mes pa realisa un serie de mehoracion cu por abarca diferente areanan.
E máximo autoridad di e universidad ta firma un compromiso pa cumpli cu e mehoracionan aki.

Otro rason mas cu ministerio a opta pa reconoce e mediconan via organo di acreditacion y no specificamente universidadnan ta pa elimina e riesgo cu e universidadnan aki den futuro no ta cumpli cu criterionan di calidad.

Esaki ta parti 1.
Dr. Dellanire Maduro (Medico General)
November 2018

You Call, We Haul
ORGINAL SWAT