Gobierno ta prefera verkavel y destrui un tereno grandi planta cu tabata duna cosecha?

Dialuna mainta a habri hopi tristo pa Pedro Bareno di Hooiberg, ora cu e ta mira un tractor ta drenta riba su tereno di planta y ta cuminsa rosa su matanan di fruta den su cunucu benta bow, cu awa na wowo Pedro ta bay puntra kiko a pasa y e ta haya un contesta cu a hasi e y su bisiñanan hopi dolor, cu nan a bin rosa pa verkavel e cunucu, cu otro palabra Pedro a perde su pida tereno di planta, unda e tawata gana un pida pan honestamente cu su sodor di frenta. Pedro a conta cu E cunucu aki el a herede di su mayornan kende a cumpra un pida tereno y a huur e otro pida 100 aña pasa di gobierno, ela sigi paga riba dje, a sigi mantene e tereno door di a sigi cu e tradicion di su mayornan di planta cunucu. Riba e tereno tin mata di Cashue di casi 100 aña biew cu su tata a planta laga atras. E ta un situacion hopi doloroso cu e ruman muher di Pedro di 96 aña a keda cu hopi dolor na su curazon y cu e no por a bin wak kiko nan ta hasiendo cu e tereno di su tata. E pida cu e tawatin sera pa su carnenan cana den dje a desaparese. Actualmente ela ser su 24 carnenan den un haula chikito paso e no por laganan cana liber pa motibo di cacho brabo y tambe e tereno unda nan tawata bay come yerba tractor a rose completo. Su bari cu tapushi di maishi rabo cla pa bay planta a keda tira memei di e tereno. Algun plaachi zink y palo cu ela cumpra pe traha riba e tereno tambe a ser rosa tira den e sero di sushi. Segun Pedro niun dia niun hende no a bin serka dje y a puntre si e no kier e tereno mas of pa mira con e ta planta e cunucu. Segun Pedro nan a bin sin avise y jega kibra su cunucu, rosa su matanan, destrui su materialnan di construccion. Esaki ta un caso hopi lamentabel cu e tiki terenonan cu nos Arubianonan a hereda di nos mayornan ta wordo kita for di nos hendenan, si kiera por a puntra Pedro si e por entrega e tereno, of sikiera por a dune un recompensa pa esaki, mirando con fertil e tera ta y no lo sigi use mas pa plantacion pero pa construccion di mas cas. Y asina poko poko lo caba cu e tradicion di cunukero. Pedro a keda tristo, den un shock, y hostina, paso e tradicion di añas a caba di nochi pa mainta, paso gobierno a haya ta bon pa kite for di e famia y verkavel e. Enberdad mester tereno pa construi mas cas, Gobierno por cumpra terenonan concess di famianan cu no ta usando nan, of terenonan bandona, cu no ta serka di niun otro cas of no ta wordo usa pa niun famia. Pa asina evita di hasi nos hendenan mas dolor.