Konkelmento y mantencion indebido na truck di Serlimar a pone un truck dal riba cura di cas

Dialuna mainta doñonan di un cas na Sero Alejandro a haya e susto di nan bida ora cu un truck di Serlimar cu a perde control a drenta den nan cura di cas bashe completamente abow y cu por poco a drenta den nan cas. Aparentemente e truck di Sushi di Serlimar aki algo a kibra den e stuur y ela perde control y no por a brake na tempo paso e brake tambe aparentemente tawatin problema. E chaufeur no por a controla e truck y a drenta den e cura di cas. Ta algo di condena cu Serlimar ta pone trucknan den estado asina deplorabel riba caminda cu sigur ta forma peligro pa su trahadornan y pa e pueblo di Aruba tambe, pa casualidad no tawatin niun hende e momento ey den e cura of cualke hende cu por tawata cana net e momento ey, ey dilanti. Ta bira tempo pa nos gobernantenan cuminsa pone prioridad ne pueblo y no sinta ta malgasta plaka di pueblo den keiromento rond mundo of den projectonan di luho. Envez di ta malgastando miyones den un tram cu no tin niun beneficio pe pueblo, bin cu Truck di sushi nobo, pa asina por garantisa seguridad di e trahadornan di Serlimar y nos pueblo. No ta prome biaha cu e trucknan aki ta daña of pieza ta kibra cu nan riba caminda, constantemente tin problema cu nan, cu consequencia cu ta keda simannan sin recoge sushi den diferente barionan. Ta spera cu pronto gobierno recapacita y pone nos pueblo como prioridad y buska truck di sushi nobo pa Serlimar.