Fuerte explosion na Calabas a haci hopi daño na varios cas den cercania y a laga 3 hende sin oido

Dialuna mainta tanto 911 di centro di alarma, como 100 di polis a haya un avalancha di yamada indicando un fuerte explosion na e parti nort di Aruba pero ningun por a indica unda exactamente ya cu e sonido fuerte aki a ser scucha te na Oranjestad y a crea hopi confusion te ora cu e yamadanan mas insistente a indica cu esaki a tuma lugar na Alto Vista y Calabas, e ora ey a dirigi patruyanan na e sitionan despues a drenta informe mas cla cu e explosion aki a sosode banda di Rancho Gavilan na Calabas. Mesora a dirigi patruyanan na e sitio ey. Na yegada di e polis di barrio na e sitio a bin compronde cu aki tabata trata di un explosion na e sitio cual un rato despues di a tira vuurwerknan a bay over na deshaci di dinamita bieuw. Aki un di e calpchinan cu no a tira mesora a bay tira y a cay despues a basha tera riba e explosivonan di e T.N.T. (trinitrotoluene) net na momento cu e trahadornan tabata core e waya pega na e blasting capsnan pa ignita e explosivonan, pero e clapchi mes a ignita esaki causando un explosion inespera causando un desorientacion y perdida di oido di e trahadornan. Na yegada di e ambulans nan a atende e victimanan y a transporta nan cu urgencia pa hospital. Algun vehiculo y tambe casnan den e area a sufri daño cu e explosion aki causando cu glasnan a rementa y plafondnan y dak tambe a zak abao. Despues di a move e victimanan polis tambe a evacua e area te ora cu e experto den explosivo Sr. Ponson hunto cu oficialnan di bombero a confirma cu tur e explosivonan a explota a duna e area como ok. Ministernan Eman y Sevinger tambe a bay na e sitio pa wak kiko a sosode. Nos lo sigui informa.....