TUMA NOTA COMPANIANAN DI PEST CONTROL PEGA PEGA TA UN BESTIA PROTEGI PA LEY

130 dia pasa , 14 di juni 2018 14:39
Seccion: salud
foto di TUMA NOTA COMPANIANAN DI PEST CONTROL PEGA PEGA TA UN BESTIA PROTEGI PA LEY
Boogaard Assurantiën - P'abo Ta Bon Segura!
foto di TUMA NOTA COMPANIANAN DI PEST CONTROL PEGA PEGA TA UN BESTIA PROTEGI PA LEY
Smart Systems Aruba - Bishita nos page pa mas informacion

ORANJESTAD – InfrAruba ta un punto di contacto nobo unda pueblo pa entrega kehonan tocante cosnan cu, segun e denunciante, ta bay robes den nos infrastructura. Inspeccion di e Departamento Naturalesa y Medio Ambiente (DNM) a ricibi un keho. E keho tawata relaciona cu un propaganda publica pa un compania local di pest control encuanto nos Pega Pega. Ta asina cu ta menciona den e propaganda cu e pest control por yuda’bo caba cu e Pega Peganan door di spuit na bo cas.
Departamento di Naturalesa y Medio Ambiente (DNM) kier informa y recorda tur hende cu na Aruba ta existi un lista di especienan protegi pa ley. Entre esnan protegi ta nos Pega Pega. Basa riba articulo 4, inciso #2, di Natuurbeschermingverordening (AB 1995 no 2), y articulo 2 seccion b. #7. di e Landsbesluit bescherming inheemse flora en fauna, e sorto Phyllodactylus Julieni (PegaPega/ House Gecko) ta un especie protegi.
Pa e motibo aki, nos ta urgi tur compania di pest control, como tambe pueblo en general, pa tene cuenta cu esaki. Incumplimento cu e ley aki tin su consecuencianan.
E Pega Pega ta habita areanan unda frequentemente tin insectonan. Ta conoci cu unda tin Pega Pega, no tin cacalaca ta biba. E Pega Pega ta come e.o. cacalaca y tambe ta mantene su area di biba liber di otro insectonan indesea. E Pega Pega ta un bestia inofensivo. E molester mas grandi ta e zonido cu e ta haci. Poco biaha e ta haci su mes visibel den cas ya cu e ta mantene su mes hopi biaha den plafon, tras di cashi y otro hoekinan scur den cas.

Pa evita cu insecto y pega pega por drenta cas, por haci uzo di screen/gaas na bo bentananan y/of mantene nan cera.
Si Pega Pega drenta bo cas busca manera di sakele bibo door di gui’e cu un basora pa e porta of bentana, no dal e mata. Rond di bo cas e por come insectonan y evita cu esakinan ta bin paden.
Bishita nos website www.dnmaruba.org y conoce mas di nos departamento y e cuido di nos flora y fauna. Tambe bo por bishita www.overheid.aw . Asina cu drenta e website aki, busca “beschermde planten en dieren” y lo bo haya e lista completo di flora y fauna protegi. Tambe riba www.gobierno.aw door di busca ”flora y fauna protegi” ta haya e lista aki na Papiamento.
Departamento di Naturalesa y Medio Ambiente (DNM) ta revisa e lista di companianan di pest control. Esaki ta necesario pa nos por comunica cu e companianan di pest controlnan. Si bo ta doño of ta maneha un pestcontrol y no a wordo contacta ainda, por fabor yama nos na DNM, tel. 584-1199, puntra pa Yessi y e lo tuma e informacion di bo compania. Tambe bo por manda informacion di bo compania na: rosa.arends@dnmaruba.org.

Wendy's - Southwest Avocado
ORGINAL SWAT