Booshi Wever di UPP: MINISTER A DETERMINA E TARIFA DI SERLIMAR CABA.

100 dia pasa , 13 di juli 2018 13:43
Seccion: politica
foto di  Booshi Wever di UPP: MINISTER A DETERMINA E TARIFA DI SERLIMAR CABA.
Boogaard Assurantiën - P'abo Ta Bon Segura!
Smart Systems Aruba - Bishita nos page pa mas informacion

Booshi Wever di UPP:
MINISTER A DETERMINA E TARIFA DI SERLIMAR CABA. E REUNION DI PARLAMENTO NA AUGUSTUS LO TA UN SHOW ATROBE?

Recientemente sr. Rocco Tjon a declara cu tur cos ta habri ainda cu Serlimar y nan ta den espera di e plannan concreto di e minister. Con e discusionnan na augustus por ta habri, si e makinaria di propaganda di Serlimar a saca un aviso cu entrante 1 di January 2019 e tarifa nobo di Otmar y di e sindicatonan lo drenta na vigor? Pues un biaha mas, e fraccion di MEP por papia,cuestiona y sapatea cuanto cu nan kier, pero ta Otmar ta manda. Esey ta e mensahe cla y raspa di e minister pa e parlamentarionan “rebelde” di MEP.
Na juli 2018 gobierno di Aruba a pospone introduccion di e tarifa cu e minister encarga cu Serlimar kier a introduci na juli di e aña aki caba y a notifica parlamento cu na augustus, durante tratamento di presupuesto, lo duna un “update” y tambe con lo bay cobra pa recohemento di desperdicio (heffingssysteem), loke UPP a cataloga como “kartelheffing”.

Ta bon conoci cu UPP a bin ta adverti pueblo riba e maneho ad-hoc di e minister encarga cu Serlimar y a mustra cu e minister no solamente ta hala e maneho di austeridad un banda cu gobierno di Aruba a implementa (crisisheffing), pero tambe ta menosprecia parlamentarionan di MEP cu a tribi di cuestiona su maneho. Y tur esaki cu e unico meta pa faborese su finansistanan di partido y crea ala ATA-bank su mesun Serli-bank.
Nunca e minister ni Serlimar tabata tin e decencia di a presenta un plan concreto y integral di kico e futuro di recohemento y procesamento di desperdicio la bay encera y particularmente cuanto esaki lo bay costa. Cada bes cu UPP a cuestiona e maneho eratico di e minister y di Serlimar, nos a tuma nota cu ta bin cu un cambio den splicacion door di e minister. Pero e minister, manera ta conoci, no ta sinta keto. Ela wordo reta pa parlamentarionan di MEP pa responsabilisa su maneho na augustus y parce cu e ta den pleno preparacion.

Na prome lugar ela tuma den servicio personal encarga cu PR cu a cuminsa campañanan pa manipula opinion publico faborablemente pa su persona prome cu e reunion di parlamento tuma lugar. Propaganda di Serlimar ta sali publica frecuentemente den medionan di comunicacion. Te hasta a sponsor e weganan internacional di baseball cu ta tumando lugar na Aruba via un canal amigo y no via nos canal nacional TeleAruba. E motibo por tin di haber cu e lasonan estrecho cu ta existi cu e canal di television y un radioemisora amigo di e minister?



Na di dos lugar a orkestra un accion sin pia y sin cabes di trahadornan di Serlimar prome cu e reunion den parlamento lo mester a tuma lugar, na unda lo a cuestiona e implementacion di e tarifa nobo pa Serlimar. Un accion cu a haya sosten di sindicato SEPPA y dirigi pa un ferviente miembro di e partido di e minister cu pa colmo ta shop-steward di e sindicato tambe. E persona aki a wordo rehabilita pa e minister, despues cu ela wordo retira for di trabou na Serlimar den pasado cu backpay y tur. Nos no por keda sin menciona e rol di STA tambe den henter e show aki.
Ainda tur esaki no ta suficiente, pasobra diripente a start un candela feros na e dump di Parkietenbos, loke obviamente a lanta e disgusto di e habitantenan cu ya caba a wordo tuma haci pa 8 aña largo door di e gobierno di AVPOR. Den medionan di comunicacion nos por a comprende cu lo bay haci un investigacion si e candela aki tabata intencional of no, pero e pregunta ta kende lo haci e investigacion y si e resultado lo ser haci publico?? En todo caso e minister atrobe a haci uzo di e “oportunidad” aki pa presenta su mes como e “angel wardador”.

Por ultimo e cherry riba e bolo ta un publicacion di Serlimar cu a sali publica dia 13 di juli 2018. Den e articulo Serlimar ta indica cu lo bay haci un investigacion di desperdicio pa indicacion di composicion. Ta referi cu lo bay acerca casi 40 mil cas. Remarcabel ta cu den e tarifa nobo e minister ta papia di 31027 cas. Pakico e diferencia di casi 9 mil cas? Tambe ta indica cu “prome cu introduci tecnologianan nobo mester haci investigacion di e tipo di e composicion di e desperdicio cu tin actual”. E investigacion a start apenas na luna di juni 2018 y lo tin un duracion di un luna, pues prome cu e reunion mester tuma lugar den parlamento.
E minister ta busca di tu sorto di manera pa pasa su plan macabro cueste loke cueste. E no ta ria pa haci uzo di tur sorto di maniobranan pa haya aprobacion manera ela haci cu Aruparking y ATAbank. Ela cuminsa cu manipulacion di opinion publico cu e unico meta pa hinca gobierno y parlamentarionan den un skina. Mientras tanto cu parlamento ta sigui warda, e minister ta sigui compromete Serlimar y Aruba den dealnan sin cu ta tene su mes nan reglanan di bon gobernacion. E ultimo noticia ta cu Serlimar a haci peticion na dos compania SO pa entrega un oferta pa pasa kabelnan di e.o. coriente y computer na e edificio di su sponsor di campaña na Pos Chikito.
A keda claramente demonstra cu e minister nunca tabata tin un idea fiho kico e maneho y procesamento di desperdicio lo mester bay encera. Ela tira un pará cu e unico proposito pa beneficia su amigonan sponsor. E no a presenta un plan integral ni tampoco cuanto esaki lo bay costa. E investigacion cu awor numa Serlimar ta bay conduci ta muestra di incompetencia y falta di conocemento di e materia di e directiva di Serlimar y di e minister. Un maneho di “Buchi robes” na unda ta “spaan het paard achter de wagen”.

Parlamentarionan di MEP por wel di dobla warda numa, pasobra implementacion di e tarifa nobo ya ta un hecho caba si nan kier of no. Mientrastanto nan ta sigui sconde tras di un reunion na augustus y tambe no ta contesta pregunta pasobra lo ta haya esakinan prematuro pa contesta. Otmar Oduber a pone e gobierno y e parlamentarionan “entre la espada y la pared” y tur gastamento di placa awor aki di parti di Serlimar ta pa cumpli cu un proposito so y esey ta pa e minister ta bon prepara pa ataca e parlamentarionan cu tribi di cuestiona su maneho. Na final di cuenta ta e pueblo atrobe lo sali perhudica.

Booshi Wever
Lider partido UPP
13 juli 2018

Cumpra bo Lotto Online - Click to Play Now
ORGINAL SWAT