Oranjestad – Respaldo ta oguyoso di por felicita cinco di su empleadonan cu a finalisa cu exito e curso intensivo di Mental Health Professional (MHP-Oplediding). E 5 cursistanan ta:
Nair Kelly, Casemanager di FACT, Tanya Feliciana, trahado social, Eargy Florentina, terapista educativo, Wesfalia Lopez, enfermera, na Opname, y Geraldine Mejia, trahado social.
E curso, cu a tuma lugar durante un periodo di nuebe luna, a enrikese conocemento di nos coleganan cu metodonan di guia, habilidadnan, y instrumentonan pa screening den cuido pa hende cu ta combati problema di salud mental.
Ademas e cursistanan a siña traha cu tecnicanan di intervencion non-verbal basa riba experiencia, unda cu frecuentemente ta wordo mira cu e metodo aki ta mas eficaz cu si enfoca riba e metodo verbal-cognitivo.
E curso tabata inclui temanan importante manera:
• Psikiatria transcultural, trabou sistematico y aspectonan intergeneracional
• Uzo di E-health, medicina psikico y con pa trata cu luto
• Instrumentonan pa screening y metodonan di guia
• Trabou cu mucha, hoben y mayor
• Ki ora mester referi e cliente y ki ora lo mester haci e guia personalmente
• Reflexion personal y profesional: kico ta haci ami e persona adecua pa ta un bon Profesional di e Cuido di Salud Mental?
E mayoria di lesnan tabata virtual, pero den luna di september e cursistanan a bai Corsou pa un siman y haya e lesnan físicamente. Por ultimo e cursistanan a bay Boneiro na mei pa finalisa e curso y gradua. E bishitanan aki a trece nan hopi mas experiencia practico y oportunidad pa intercambia conocemento cu coleganan for di e otro islanan.
Respaldo ta sumamente oguyoso di e desaroyo di nos coleganan y ta mira e logronan como un paso importante pa sigui mehora e calidad di nos servicio.
Nos cursistanan tambe ta agradecido na e management team di Respaldo pa duna nan e oportunidad aki y e confiansa pa demostra nan desaroyo profesional.
Respaldo – Comprometi cu crecemento, innovacion y bienestar di nos comunidad.
Respaldo rumbo pa un organisacion di salud mental specialisa profesional y sostenibel pa un Aruba mentalmente sano.
