Oranjestad – Como parti di e proceso di e Contrato Colectivo di Trabao (CAO), riba diahuebs 8 di januari 2026, Respaldo y sindicato ABV a firma un Protocol di CAO 2026–2028, cu ta sirbi pa establece oficialmente e acuerdonan pa e proximo periodo di tres aña.

 

Durante e acto, señora Gina Maduro a gradici tur presente pa e firmamento di e protocol. Di parti di ABV, e la indica cu ta un placer pa firma un contrato colectivo pa tres aña consecutivo. Sra. Maduro a remarca cu negociacionnan entre ABV y Respaldo a tuma luga den un manera flexibel y relahante, cu bon comunicacion, cu transparencia y colaboracion mutuo. Semper tumando den consideracion loke e compania por carga, creando un ambiente di respet mutuo pa yega na ‘win-win situation’.

 

Señora Maduro a gradici e team completo di Respaldo cu a participa den e negociacionnan. E la gradici tambe su propio bestuur di ABV pa nan esfuerso y compromiso.

 

Di parti di Respaldo, directora señora Caroline Hart, a indica cu e puntonan mas importante pa e CAO 2026-2028 ta oficialmente estableci den e protocol, asegurando claridad y stabilidad pa tur partidonan envolvi.

 

Señora Hart a gradici señora Gina Maduro y su team di ABV pa nan aporte, dialogo constructivo y e cooperacion, como tambe miembronan di e management team di Respaldo cu tabata envolvi den e negociacionnan cu e sindicato ABV.

 

Finalmente, señora Caroline Hart a expresa cu Respaldo ta hopi contento cu e resultadonan logra te cu awor, ya cu e beneficionan acorda ta contribui directamente na progreso y bienestar di e trahadornan.