Royal Power Tat Fat ta gana Stingers 11-9 mientras Yoyo Power ta derota Salbabo 9-1

Copa Noord 2026 organisa pa Calabas Blue Jays dedica na (5) Baluarte Lea Tromp, Maria Boekhoudt, Aldrin Boekhoudt, Jeta De Cuba y Lenin Ashby a continua den weekend tanto na veld di Centro di Bario Noord y veld di Calabas.

Royal Power Tat Fat ta gana Stingers den un wega di toma y dame:

Diabierna anochi riba veld di Centro di Bario Noord Royal Power Tat Fat ta enfrenta e ekipo di Stingers di Monserat Noord kendenan ta compitiendo pa nan di dos aña den Copa Noord. Por a tuma nota cu Stingers su ekipo ta bon prepara y nan ta cresiendo dia pa dia y ta hungando un bon softball.  Stingers ta pika bay ariba 3-0 den cabez di prome inning pero Royal Power ta corta ventaha cu 2 careda den bom di dos inning. Royal Power ta anota 3 careda den di 3 inning y ta rally pa 6 careda den bom di 4 inning. Stingers no ta baha cabez y ta piki 2 careda den 4 y 4 careda mas den cabez di 5. Finalmente Royal Power ta gana e Partido 11-9. Boxscore Royal Power 11 careda, 12 hit, 1 error. Stingers 9 careda, 15 hit , 2 error.  Royal Power como ekipo a bay di 26-12 pa un averahe di 462 mientras Stingers a bati 33-15 pa un averahe di 455. Sendley Danies ta lansa 4 inning y 1 tercio seyando e victoria riba su nomber. Kelvin Silvania ta drenta como closer pa paga e candela y ta pone e prome partido salba riba su nomber. Pedro Mauricio ta resulta pitcher perdedor ricibiendo relevo di Lucas Henriquez den di tercer entrada. Mihor bateadornan pa Royal Power a resulta Giandrick Lacle di 1-1 (2 rbi), Jerieel Rafael (2 rbi), Jomark Flanegin, Kelvin Silvania (2rbi), Yeify “Tuly” Silva (2rbi)  tur a bay di 3-2,  Mihor bateadornan pa Stingers a resulta Juan Gonzalez di 5-3, Daveny Lynch (2rbi) y Anderson Giel nan batenan tabata na candela ambos di 4-3, Jourick Blanco (2rbi) y Djouhadson St Germain a bay di 2-2 mientras Jean Pierre Geerman a bay di 3-1 cu un cuadrangular mas 4 careda impuha. Pues por mira atras riba un tremendo wega di toma y dame unda publico por a gosa di e espectaculo combina cu 27 imparable hunto mas varios doblete, triple y cuadrangular.

Yoyo Power ta derota Salbabo 9-1

E muchanan di Yuri Bracho esta e ekipo di Yoyo Power compitiendo nan prome biaha den Copa Noord a sali tremendo y ta invicto den 3 partido. Diabierna anochi nan a derota e sub campeon di Copa Noord 2025 Salbabo cu trankilidad. Boxscore Yoyo Power 9 careda, 15 hit, 1 error. Salbabo 1 careda, 7 hit, 1 error.  N. Guitierrez ta cubri henter e ruta y ta resulta pitcher ganador. Robert Henriquez kende ta ricibi relevo di Elwin Falconi den di dos entrada ta bay cas cu e derota. Mihor bateadornan pa Yoyo Power ta J.Pire(cu 3 rbi), L.Diaz y B Rincones (cu 4 rbi) tur a bay di 3-3, C Sanchez y Y.Arias a bay di 1-1. Yoyo Power como ekipo a bati di 28-15 pa un averahe di 535 y mientras Salbabo a bay di 20-7 bon pa un averahe di 350. Weganan ta continua e weekend binidero diabierna y diasabra riba veld di Centro di Bario Noord mientras diadomingo e weganan lo ta riba veld di Calabas Blue Jays. Fanatico ta keda cordialmente invita paso ambiente y bon wega tin!