Oranjestad – Fundacion Salud Mental Aruba Respaldo a logra un paso importante den e proceso pa realisacion di un edificio nobo pa cuido di salud mental na Aruba. Directora di Respaldo señora Caroline Hart a ricibi oficialmente e carta di DIP den cual ta stipula cu e tereno na Kibaima a keda reserva pa e proyecto di e edificio di Respaldo.

 

E entrega a tuma lugar door di Minister di Infrastructura, Energia y Telecomunicacion, señor Rene Herdé y ta resultado di colaboracion cu Minister di Salubridad, Asunto Social, Cuido di Adulto Mayor y Maneho di Adiccion, señora Mervin Wyatt-Ras. Gobierno di Aruba a pone un tereno na disposicion di Respaldo pa haci realisacion di e edificio nobo posibel.

 

Pa Respaldo esaki ta un paso concreto y importante den un proceso cu lo crea mas espacio pa amplia su capacidad y sigui desaroya su servicionan. E edificio nobo mester brinda e posibilidad pa ofrece mas y mihor servicio di salud mental, den un ambiente moderno y adapta na e necesidadnan di cuido y asina por atende un publico mas amplio na Aruba.

 

E proyecto ta wordo realisa den colaboracion cu Fundacion Mama Ties cu ta hunga un rol esencial den haci e edificio nobo realidad. Respaldo ta sumamente agradecido pa nan compromiso y sosten como tambe na Minister Herdé y Minister Wyatt-Ras pa nan colaboracion y pa reconoce e importancia di sigui inverti den cuido di salud mental na Aruba.

 

Minister Wyatt-Ras a enfatisa cu e proyecto aki no ta solamente un soño di Respaldo, sino un aspiracion comparti pa tur esnan cu kier mira un futuro mihor pa salud mental na Aruba.

 

Respaldo lo sigui traha hunto cu Fundacion Mama Ties, Gobierno di Aruba y otro partnernan pa sigui duna comunidad di Aruba e cuido riba area di salud mental di calidad halto cu nan merese.