Diasabra madruga a drenta informe di un caso di tiramento na Pos Chikito, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un drive-by shooting unda un dama di 27 aña sinta dilanti su cas a haya tiro na cabes y a pidi ambulans cu urgencia. Na yegada di e ambulans no por a haci nada otro pasobra no tabata tin señal di bida di e dama D.C.L.V. di 27 aña. Por a compronde cu na e cas tabata tin unicamente 2 yiu y e wela kendenan a observa full e incidente aki mientras e drive-by shooter a sigui core. Autoridadnan competente a presenta y a cuminsa cu un investigacion riguroso na e sitio. Ta ser papia cu e caso aki tin di haber cu e ultimo casonan di drive-by shooting. Na famia di e fayecida ta bay nos mas sincero palabranan di condolencia.
VERSION POLICIAL:

-Cuerpo Policial Aruba Ta informa –

Diasabra madruga pa mas o menos 3:10 central di polis ta wordo notifica cu na un cas na Pos Chikito un hende muher lo a wordo alcansa pa un tiro y no ta reaciona.

Central di polis ta despacha polis y ambulance pa e sitio di e sucedido.

Na yegada di e prome patruya ta topa cu un hende muher den cura di su cas y no ta reaciona.
Ambulance ta yega na e sitio pero lamentablemente no por a haci nada mas.
Dokter forensico ta presenta y ta constata morto di Diviene Celine Lillian Vlaun naci na Aruba 12 di mei 1999 ( 27 aña).

E prome informa ta cu un auto color scur lo a pasa dilanti e cas y lo a los tiro na unda un of mas bala a alcansa e victima cu tabata den cura di su cas.
Diferente unidadnan di polis ariba caya tambe ta presenta y cuminsa busca rond pa si por topa auto.

Recherche y polis forensico ta presenta pa haci nan investigacion.
Departamento di slachtofferhulp tambe a presenta pa duna sosten na famia di e fayecido.

Cuerpo Policial Aruba ta haci un apelacion es cu sa algo of a wak algo pa yama e tiplijn di polis cu ta 11141. Bo ta keda anonimo.

Cuerpo Policial Aruba ta manda palabra di condolencia na famia di e fayecido.