Diaranson 20 di October Prome Minister Evelyn Wever – Croes tabata na Sint Franciscus College den cuadro di e proyecto E- learning. A logra cumpli cu e promesa pa e scol ricibi borchi digital ‘CTouch’ e aña escolar aki conhuntamente cu Chrome Books, pa e lesnan por wordo duna den forma mas digital, Innovativo y atractivo.
Prome Minister a keda sumamente impresiona di mira con e docentenan y alumnonan a brasa e proyecto. E scol aki ta e di cuatro scol cu ta participa den e proyecto aki di E- learning di FUTURA y e deseo ta pa yega na tur otro scol di Aruba tambe.
“Mi kier felicita Sint Franciscus College y gradici nan pa e forma con nan a apoya e proyecto conhuntamente cu SKOA cu a hunga un rol sumamente importante den esaki y FUTURA cu a haci tur esaki posibel.”
Minister di Enseñasa y Deporte Señor Endy Croes, tambe tawata presente na e ocacion special aki y a gradici FUTURA pa e proyecto aki y a expresa su deseo pa pronto tur mucha di tur scol na Aruba por disfruta di e manera innovativo aki di enseñansa.
Directora Nadine Kirindongo: “E experiencia ta tremendo pa maestronan caminda cu awor por duna les den forma innovativo, varia y cu ta capta e atencion di muchanan di biaha. Por wak esaki bek den nan mehoracion di cifra, comportacion, participacion y motivacion”, Señora Kirindongo a expresa gradiciendo pa e oportunidad y a expresa su deseo cu tur scol por ricibi e oportunidad aki tambe.
