Minister Xiomara Maduro di finansa ta informa: Presupuesto pa aña 2021 lo tin un deficit di 140 miyon menos

Prome cu fin di aña lo presenta e cambionan na Parlamento

ORANJESTAD – Anticipando riba e cambio di Presupuesto 2021 di nos Pais, Minister Maduro di Finansa a manda informa Parlamento den e ‘Najaarsnota 2021’ riba e cambionan cu a presenta despues cu a aproba e Presupuesto pa e aña. Importante pa menciona ta cu e deficit premira pa aña 2021 ta 140 miyon florin mas chikito. Pa aña 2021 a premira un deficit di 762 miyon florin cu awor lo baha y bira 622 miyon florin.

E bahada ta e resultado di un subida chikito den entrada y ta wordo causa principalmente pa bahada den gasto door di cambio di maneho y resultado positivo inespera. E subida den entrada ta debi na cambio den maneho di erfpacht cu a duna resultado positivo. Pa locual ta gastonan, tin gastonan cu no ta bay wordo realisa manera gastonan pa cubri eventual deficit di AZV y SVB, gastonan di Subsidio di Salario cu ta menos cu premira y gastonan di TIO cu no lo wordo introduci mas den aña 2021. A haci algun cambio di maneho tambe cu a resulta den menos gasto. Ta trata di gastonan relaciona cu pakete di cuminda, servicio y producto, proyecto PPP di Watty Vos Boulevard y Green Corridor y gastonan di Ombudsman cu ta wordo temporisa.

E siman aki e concepto di ley pa haci e cambionan den Presupuesto 2021 a bay pa Raad van Advies pa ricibi conseho. Despues cu Gobierno haya e conseho lo haci e eventual cambionan y lo manda esaki pa Parlamento di Aruba pa asina e ley por wordo trata y aproba prome cu aña caba.

Share:

Leave a Reply

Your email address will not be published. Required fields are marked *