En conexion cu introduccion di video y website di Guia Educacional
ORANJESTAD: Dialuna mainta Minister Endy Croes tabata presente na FAVI caminda Minister a ricibi informacion di e programa Guia Educacional, curso y otro servicionan cu FAVI ta ofrece na su clientenan. Minister Endy Croes hunto cu directiva di diferente scol a haya un primicia di e presentacion di introduccion di e video y website di Guia Educacional. Despues di un presentacion informativo Minister Endy Croes a haya un tour pa asina conoce e luga.
FAVI ta duna guia y sosten na 51 mucha di edad entre 0 pa 18 aña y mas di 400 cliente cu FAVI ta brinda ayudo. FAVI ta conta cu dos Guia educacional sra. Meredith Faarup y sra. Annemarie Navas cu ta duna guia na e docentenan y otro educadornan na scol den ramo di educacion.
Minister Endy Croes a sigui bisa cu na momento cu e la yega FAVI su wowonan a wordo tapa y la haci uso e garoti como guia cana y asina yega den e local unda e presentacion a tuma luga. ‘Bo ta experencia pa bo mes con personanan sea sin bista of cu limitacion visual ta sinti nan mes of con nan ta biba nan dia diario’ e Mandatario a expresa.
E presentacion tabata uno hopi educativo na unda cu bo ta wak cu con hopi amor y pasion e ekipo di FAVI ta traha. FAVI a lansa un website nobo unda cu nos ta pidi comunidad pa comparti esaki, bo por reconoce señalnan di personan cu limitacion di bista y hopi tempran por brindanan ayudo. Riba e website docentenan por haci cierto ehercicionan cu e alumonan y tin diferente forma cu ta guia bo con pa busca ayudo na FAVI.
Minister Endy Croes a sigui bisa cu a ricibi splicacion cu tin dos alumno den e tercer aña di HAVO cu desde e prome klas di scol basico y a haya e guia necesario y durante henter nan trayectoria te na scol secundario. Nan ta ehempel pa nos stimula otro y duna oportunidad na tur esnan cu ta sufri di limitacion di bista. Por ultimo e Madatario a gradici pa e invitacion y recepcion alabes felicita FAVI na su directora Cetty Baarh y henter e ekipo di FAVI pa e tremendo trabou cu nan ta haciendo y cu e lansamento di e website y video.
