Minister Rocco Tjon: A TUMA PASONAN CONCRETO DEN CUADRO DI RESTRUCTURACION DI GARASHI DI POLIS

ORANJESTAD – Diahuebs mainta durante un rueda di prensa na garashi di polis na Balashi, Minister di Husticia y Asuntonan Social Sr. Rocco Tjon a papia tocante e procesonan cu a wordo encamina for di luna atras pa loke ta e limpiesa cu mester wordo haci na garashi di polis na Balashi. Ta trata di un problema cu pa hopi aña Cuerpo Policial di Aruba ta wordo confronta cune. 

Desde aña 2011 tin algun procesonan cu a wordo poni riba papel y a base di e procesonan aki, tawata haci e tipo di limpiesanan aki. Sinembargo, for di Ministerio di Husticia y Asuntonan Social a logra pa yega na un strucutura y asina a forma un taskforce cu ta consisti di huristanan di Ministerio Publico; cual ta un socio hopi importante, pero tambe di esnan den sector priva. 

Tin un motibo pakico a pone e taskforce aki traha di tal manera. Actualmente, tin dos motibo pa cual autonan por wordo aloca na garashi di polis; sea nan ta wordo poni den custodia, of nan ta wordo confisca, y a base di e dos puntonan aki e ta hopi importante pa e procesonan ta bon delinea pa evita cu pais Aruba mester para responsabel pa cierto dañonan. Algun siman atras tawata tin ladronicia na garashi di polis na Balashi y esaki ta un di e motibonan pakico kier percura pa na un forma structural e limpiesa aki tuma luga. Asina ta evita cu garashi di polis, pero tambe e diferente wardanan di polis caminda tambe tin autonan ta wordo staciona, haya nan mes atrobe den un situacion similar, pa motibo cu e ta atacha tambe e seguridad di personal 

Actualmente tin un proceso hinca den otro, bou autorisacion di Ministerio Publico, caminda e autonan aki segun ley, cu ya tin un cierto temporada para na garashi, lo wordo destrui, of lo bay un findishi, y pa e motibo ey sector priva a wordo incorpora den esaki, na manera cu expertonan den daño material lo duna conseho di kico mester haci cu cada vehiculo. A haci palabracionnan estricto cu Daltra Antiles N.V. den e caso aki, pues tur e autonan aki lo bay Daltra y nan lo wordo destrui, pa di e forma aki pais Aruba tambe por haya su “fair share” caminda e fondonan aki lo wordo re-usa pa percura pa e seguridad entre otro na warda di Balashi pero tambe na e demas wardanan di polis. 

Share:

Leave a Reply

Your email address will not be published. Required fields are marked *