ORANJESTAD; Siman pasa Minister di Enseñansa y Deporte sr. Endy Croes hunto cu colega Prome Minister sra. Evelyn Wever – Croes a reuni cu Obispo Luis Antonio Secco y Vicario Episcopal Pastor Andres Macovic di parokia di Savaneta. Un bon reunion y fructifero unda a trata tema di enseñansa, SKOA y nan retonan.
Obispado ta doño di diferente edificionan di scol cu SKOA ta maneha. E reunion a bay riba temanan di importancia pa cu enseñansa y e retonan cu esaki ta presenta. Tabatin atencion special riba e temanan pendiente entre otro;(1) e problematica pa cu e werksters di SKOA,
(2) pa haya claridad riba e suma mensual cu e stichting no a ricibi mas di Financiën, cu tabata pa paga e primanan na belastingkantoor y (3) “Terugbetaling” di e suma cu SKOA a ricibi dos biaha.
Actualmente tin un comision atraves di un Ministeriële Beschikking nombra di expertonan interno y externo pa soluciona esaki. Tanto Minister President sra. Evelyn Wever – Croes y Minister di Enseñansa y Deporte sr. Endy Croes a splica Obispo Luis Antonio Secco y Vicario Episcopal Pastor Andres Macovic cu e boluntad tey pa soluciona tur problema y nan por tin e garantia cu esaki ta e obhetivo di Gobierno y ta premira cu pronto e solucionnan ta riba mesa den e miho interes pa henter Aruba.
