Calabas/Kudawecha – Despues di un siman largo di tension, di tiramento di palabra ‘heen en weer’ y chuerchemento bay off, porfin e bataya tan spera entre e trabuconan di pariba di brug, esta TEAM PARIBA LEGENDS, y e cunukeronan di TEAM BOU PALO BOYS, a drenta e arena diasabra anochi ultimo n’e unico y mundialmente famoso Domino Square Garden na Calabas. Cos tabata cla e anochi ey p’e ‘fireworks’!
Prome cu half time, e ekipo di BOU PALO BOYS mester a wanta dos clean board, dos sapato blanco bunita asina cla pa yena nan cu yerba y pone pa Sinterklaas su cabay! Sinembargo, mester bisa cu cunukeronan di BOU PALO a hala faha mara y a drenta mita tempo c’un bentaha di 11 – 8.
Den e di dos tanda, ata ‘express delivery’ ta bati na porta di PARIBA LEGENDS. Ora nan habri porta wak, nan ta haya nan dos sapatonan blanco cu etiket marca ‘retour tosender’! Cos a bira hot di biaha! Den un tremendo bataya estilo ‘last lap’, BOU PALO BOYS ‘langzaam maar zeker’ ta sa di bay dilanti y na final presion ta coy curba dje legendarionan di pariba y nan nervionan no por wanta mas. BOU PALO BOYS ta gana cu score convincente di 21 – 16, y ta pinta un mapa bunita p’e legendarionan unda nan mag bay sosega bou dje famoso palo dilanti Domino Square Garden! Un remarca cu a yega na mesa di redaccion ta cu e famoso y legendario ‘Snor’ Perez no a hunga e anochi ey, y ta p’esey mes a keda demostra cu sin e ‘edge’ di Snor, PARIBA LEGENDS nan ‘handsanitizer’ ta bira slap … slap! Por ultimo, den un entrevista exclusivo, un ex-pancho di decada 70, un tal R.J., a declara cu cuidao sigui uza e palabra ‘LEGEND’ sin su autorisacion, ya cu t’e ta e unico cu mag yama su mes LEGEND DI PARIBA. Shonnan keda pendiente pasobra e desenlace dje novela aki no a yega ainda!
