Minister Geoffrey Wever durante bishita na Aruba Aloë: Stimula local y exportacion ta un prioridad

Recientemente Minister di Asuntonan Economico, Comunicacion y Desaroyo Sostenibel, Geoffrey Wever a haci un bishita na Aruba Aloë Balm N.V. Durante un recorido di e plantacion y tambe e fabrica, Minister Wever a haya un splicacion amplio di gerente di Aruba Aloë Balm N.V. di e historia di e empresa, e manera con e empresa a crece y ta sigui crece. Tambe a duna un splicacion di e proceso di produccion. Minister Wever a keda impresiona cu e nivel di profesionalismo y calidad cu e compania ta desplega, y asina tambe con nan ta exporta un cantidad grandi di producto nan “Made in Aruba”. 

Na 2020 Aruba Aloe Balm N.V. a cumpli 100 aña di existencia y atraves di decreto royal a haya e honor pa hiba e nomber “Royal Aruba Aloe”, haciendo e empresa local aki, e promer den Caribe Hulandes pa hiba e titulo aki.

“Ta bunita pa mira un empresa local, cu un historia comercial Arubiano unico”, segun Minister Wever.Mirando cu ta trata di empresarionan local, cuminsando cu famia Eman na 1890, cu a haci Aruba un di e exportadornan di Aloë mas importante na mundo y awe ainda ta existi y ta innovando nan productonan continuamente y tin presencia internacionalmente. Aloë ta parti di e historia comercial di Aruba y den pasado a forma un fuente di entrada significante pa hopi famia Arubiano y pa e motibo ey tambe ta forma parti di escudo di nos pais.  

E bishita di Minister Wever na Royal Aruba Aloë ta forma parti di varios bishita na productornan y exportadornan local den e cuadro di stimula produccion y exportacion local. Mirando nos dependencia riba importacion, Minister Wever kier stimula mas produccion local, tanto pa e mercado local, pero tambe pa exportacion, asina tambe por reduci e dependencia riba productonan di afo. Ta pa e motibo aki ta importante pa compronde con nos como gobierno por asisti empresanan cu legislacion y un maneho cu ta facilita y stimula mas produccion local y exportacion, haciendo e bishitanan aki hopi importante.

Minister Wever a keda satisfecho y kier gradici Royal Aruba Aloë pa e experiencia y experticio comparti.

Share:

Leave a Reply

Your email address will not be published. Required fields are marked *