MINISTER ENDY CROES A REUNI CU ARUBA ATHLETIC FEDERATION ‘AAF’

ORANJESTAD; Siman pasa den un encuentro ameno miembronan di e directiva nobo di Aruba Athletic Federation; secretario, sr. Rammy Ramada, tersorero sra. Moraima Luydens y vice presidente, sr. Fernando de Graf a reuni cu Minister di Enseñansa y Deporte Endy Croes. Durante e reunion a papia di diferente temanan di preocupacion manera; e pista di practica deporte cu no ta aproba, e pista tin seis ‘lane’. E Mandatario a expresa cu e pista mester di renobacion y mester wordo amplia cu dos “lane” mas pa por wordo aproba internacionalmente. Den poco tempo e directiva nobo a haci diferente cambionan, renoba e sistema y a crece e deporte di shete club pa diescuatro club y a atrae atletanan nobo di 190 pa 400 atleta.

Minister Endy Croes a sigui bisa cu Aruba Athletic Federation a pidi Gobierno di Aruba pa explora pa hunto cu World Athletics Legacy Program pa inverti pa yega na un manera pa drecha e pista completamente. AAF a presenta algun oferta caba y Gobierno di Aruba kier aporta.

E mandatario a sigui bisa; nos sa cu e stadion mester wordo renoba tambe pa loke ta e infrastructura mes tin un parti di e tribuna mester wordo renoba,  yerba mester wordo cambia y e luznan mester wordo drecha pa futbol den combinacion cu e deporte di atletismo. Nos a compromete cu AAF cu nan lo bay haci nan tarea pa wak te unda World Athletics Legacy Program ta dispuesto pa inverti y Gobierno di su banda lo explora tambe pa pone placa disponibel pa yuda drecha e facilidad aki, unda e atletanan por sigui eherece nan deporte miho. Durante e reunion a bin pa dilanti cu AAF tin mester di un “timing system” nobo pero esey nos lo papia mas dilanti ariba dje.

Aruba Athletic Federation ta desea pa nos logra e proyecto aki pa kisas pa 2023 unda cu Aruba por trece Carifta Games y/of otro weganan internacional cu lo hala hopi atencion pa nos isla pero e facilidad mester ta cla prome. “Nos lo traha den cooperacion cu AAF pa por logra esaki”, e Mandatario a finalisa.

Share:

Leave a Reply

Your email address will not be published.