Nan a habri e hotel na Aruba: Empleadonan di Marriott ta contento cu nan crecemento

ORANJESTAD, Aruba – 21 di december 2021: Aruba Marriott Resort & Stellaris Casino tin un total di 113 empleado cu ta trahando pa mas di 25 aña caba. Pa nan, Marriott no ta solamente nan luga di traha, pero ta nan cas, unda nan a crece profesionalmente. Mas cu djis nan cas, nan ta considera cu ta trata nan manera un famia y hunto nan ta brinda e miho servicio posibel na e huespednan.

Lourdes Ruiz, ta e Casino Slot Supervisor na Stellaris Casino. El a cuminsa traha cu Marriott 26 aña pasa como dealer di casino y despues di un aña a promove como table supervisor. Despues di diescuater aña un biaha mas a promove Ruiz como slot supervisor. E ta hopi orguyoso di ta trahando eynan pa 26 aña caba. 

Desde su prome dia te awe el a mira hopi cos bon, cambio, yen cara nobo, sin lubida esunnan cu a bay y cu no t’ey mas cu nan. E ta sinti fantastico ta trahando 26 aña na Marriott. Trahando eynan ta algo grandioso p’e y su famia. Nan tin bon beneficio y hasta nan famia por haci uzo di nan. Marriott ta un compania stabiel, cu ta pone su empleadonan na prome luga. Su mensahe ta cu si un persona haya e oportunidad pa drenta e compania, cual no ta facil pa drenta, asina bo logra drenta, pa cuida bo trabou. Marriott ta un compania unda cu por logra hopi eyden, por crece masha hopi mes. 

Jose Francisco Vargas ta un Sous Chef y tambe ta parti di e “charter team” cu a habri Marriott na Aruba algo mas cu 26 aña pasa. Prome cu el a bira supervisor di cushina, Vargas a traha den diferente area di cushina. Awo e tin e posicion di sous chef y ta haciendo esaki pa ocho aña. E ta sinti su mes confortabel na su trabou. E impacto cu Marriott tin pa su persona ta bon, pasobra el a progresa den bida. El a logra adkiri hopi conocemento y den su bida personal, Vargas a logra hopi di su obhetivo y ta spera di por sigui cumpli cu nan.

Julie Paligpig ta Housekeeping Supervisor na Marriott Surf Club. P’e trahando asina hopi tempo ta algo bon y awo e ta forma parti di e famia. El a yega for di Filipina y esaki tabata su prome y unico trabou den henter su bida. Pa loke ta trata su famia, su yiunan tambe a crece den e compania aki.

Un otro empleado cu ta trahando 26 aña cu Marriott ta Annie Theophile como In-Room Dining Coordinator. Trahando 26 aña cu Marriott ta nifica hopi pa su persona. E ta hopi contento y orguyoso di forma parti dje compania aki. Algo cu a haci impacto pa su famia ta e orario di trabou, pasobra cu su famia e ta un bon combinacion pa balansa tempo na cas y tempo na trabou. Un mensahe cu e tin ta ora di traha, bo mester haci loke ta spera di bo. Tambe percura ora di bay traha pa ta na ora, presenta tur dia y ta dispuesto pa bay e extra mile. “Haci bo trabou manera mester ta”, el a expresa.

Empleadonan fiel na Aruba

E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ta sigui atrae huesped pa e hotel.

Tocante Marriott Aruba

Aruba Marriott Resort & Stellaris Casino a habri dia 31 di augustus 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott & Stellaris Casino ta consisti di mas o menos 1200 empleado den servicio directo. E compleho di Aruba Marriott & Stellaris Casino ta esun di mas grandi den henter Caribe, tanto den cantidad di camber como den cantidad di empleado.

Share:

Leave a Reply

Your email address will not be published.