Na momento cu e pandemia a presenta su mes, hopi a wordo papia, hasta propaganda cu e “Normal Nobo”. Un aña pasa pueblo tabata wordo bisa pa prepara p’esaki y cu na 2021 esaki lo mester cuminsa haya forma.

Un normal nobo cu tabata inclui un speransa pa un cambio pa mihor pa un y tur. Sinembargo e “normal nobo” tabata nada mas cu un fata morgana. Mientras cu tabata kier pa tur hende cambia, nos gobierno y nos Parlamento a keda cu e mesun racha di manipulacion, abuso di poder, nepotismo, etc. Pues “business as usual”.

Mientras cu un eleccion ta respresenta un momento pa un cambio real, y cu partidonan chikito a haya sosten, nos por mira cu nada a cambia, cu excepcion e caranan. Pa colmo, prome cu a forma e gobierno nobo, e presupuesto 2021 a haya un sosten di mayoria, implicando cu a bay di acuerdo cu e maneho di POREDmep, cu den campaña a critica ferozmente. Esaki a bay pareu cu e racha di “Golden Handshakes”, mas nombracion di “friends & family”, firmamento di contractonan multi- miyonario, sin pueblo sa e contenido (ainda)! Pakico? Pa atrobe previlegia compinchi di un banda? Y di otro pa sigui sinta den stul di sea minister of parlamentario?

Otro indignacion cerca nos pueblo ta e maneho pa cu COVID. Ken tin e culpa diripente cu e casonan a aumenta drasticamente? E medidanan draconico cu gobierno a presenta ta dirigi na e pueblo so!

Tin hende ta pensa cu semper nos di UPP tin algo contra of critica, sea cu algo ta bon, malo of robez! UPP desde su principio a haci esaki y lo sigui haci esaki. Pero di otro banda nos lo sostene tambe si algo ta bon. Esaki nos a haci na 2020 ora cu gobierno a cu su medidanan pa contene e pandemia cu a presenta. Pero ora cos abay robez, nos UPP a hala atencion tambe!

Nos a bisa, cu den e maneho di e pandemia no tin lugar pa heroe, mirando cu diferente minister tabata purba briya na momento cu cosnan tabata bou control. Tabata tin elogio p’aki y p’aya. Pero a hunga heroe ora resultado ta bon. Pero ora cos sali for di man, ta culpa e pueblo. Pero e problema principal ta, cu esnan cu ta responsabel, no a ni ta carga nan responsabilidad. No tin ni tabata tin “DAADKRACHT”. Nos por mira esaki ultimamente, ora ta presenta medidanan despues di a duna oportunidad di sigui pachanga y bochincha!

Pasobra realidad ta, cu Prome Ministro, Minister di Salubridad, hunto cu nan “expertonan” por tabata sa cu SIN MAN DURO,  pa TUR, pero TUR hende, nos lo sinti e consecuencia, manera atrobe ta e caso!! MAN DURO riba cumplimento di ley-  y reglanan, pero tambe den ehecucion di algo asina sensible di loke ta vacunacion y test! No por pone KEN CU TA haci e trabou discreto aki, djis pasobra ta amigo of campañador. Y djey purba scapa cu, “pero no ta ambtenaar nan ta.”!

Por broma cu mas di 85% di e poblacion ta vacuna y cu  un porcentage halto a haya e “booster prik”! Pero si NO actua cu man duro, e casonan lo sigui subi. Cada bez nos a señala cu e “HANDHAVING” y e “PREVILEGIAMENTO” ta e factor cu lo bay causa un subida drastico di e contagio! Esaki a sosode prome cu eleccion,  ora a core campaña miyonario y a fiesta pa motibo di e resultado. Despues di esaki, ata pueblo un biaha mas a wordo castiga. Pa colmo parce Aruba ta sin gobierno y sin guia pa atende e problema di aumento di casonan.

Anto UPP mester keda keto? Siman pasa nos a habri siman cu e comienzo di e brote number 5 y gobierno ta anuncia cu nan ta cla pa esaki! Sinembargo den propio seno nan fiesta na grandi den dos fiesta, pa djey bin anuncia medidanan drastico cu un cara di “YO NO FUI”, “YO NO SE NADA” y “NO CULPAMI”! Hipocrecia di marca mayor nos ta yama esaki!

Pues, un biaha mas: mester tin un ”HANDHAVING” pero cu “MAN DURO”.  E regla mester ta pa TUR hende y a base di e principio di “ONE STRIKE OUT”, esta ora constata un violacion, mester cera e establecimento MESORA y “TOT NADER ORDE”! E ciudadano cu pega cu e reglanan duna un multa halto tambe!! SIN DISTINCION! Aplicando “LEY PA UN LEY PA TUR” so, nos lo por contene e pandemia aki.

Yegando na un otro fin di aña, nos ta puntra nos cu si nos por cualifica 2021 como un aña bon den nos gobernacion? Con nos ta mira e grado di TRANSPARENCIA y INTEGRIDAD? Ki speransa nos tin pa 2022?

Tin hopi di nos con-ciudadanonan a y ta pasando den duro. Di un banda como consecuencia di e pandemia, pero mas ainda dor di e gobernacionnan di e ultimo tempo, cu a resulta manera e presidente di Parlamento mes a indica: “Aruba a bira e pispaaltje di Hulanda”!, reconociendo asina cu nos autonomia ta entrega! Y como no sifuera poco, awor cu kier mina e libertad di expresion, e.o. dor di menasa medionan di comunicacion!

Pa Aruba por sali di e abismo aki, 2022 mester bira e aña na unda CLARIDAD, SINCERIDAD, TRANSPARENCIA, PARTICIPACION y INTEGRIDAD realmente lo mira luz di dia. Y asina a base di DIALOGO, COMPRENSION Y UNION, nos enfrenta e retonan cu nos tin como pais y pueblo. Y UPP como e “watchdog” pafo di Parlamento lo keda ofrece ta e SPERANSA y e CONVICCION pa vigila esaki, cu E BERDAD pa trece e CLARIDAD necesario!

Mescos cu desde fundacion di UPP, pueblo por ta sigur cu nos lo tey un biaha mas para na vanguardia di e interes di e pueblo Arubano e tempo nos dilanti.

Miembro di Partido UPP

Booshi Wever

28 december 2021