Relacion Aruba – Hulanda: PRONTO SOLUCION PA E IMPASE DI PROTOCOL

Den un carta cu Secretario di Estado Raymond Knops a dirigi na Tweede Kamer na Parlamento Hulandes siman pasa, el a indica cu e ta dispuesto na yega na un protocol cu Aruba cu un fecha final. Prome Mininster Evelyn Wever-Croes a duna di conoce cu esaki ta prome biaha cu di parti di señor Knops ta indica cu ta dispuesto pa haci esaki.

PROTOCOL

Manera ta conoci Aruba y Hulanda a yega den un impase riba e tema di sosten di likides ora cu Hulanda na fin di november a pone un condicion nobo riba mesa: prolongacion di e protocol di supervision financiero di 2018 pa un tempo indefini, pues tot nadere orde. A base di esaki Aruba a indica y a keda riba su punto cu esaki no ta posibel. Prolonga un protocol sin fecha final ta contra nos constitucion y ta bypass Parlamento.

Gobierno di Aruba a trata na splica Gobierno Hulandes esey sinembargo debi cu e condicion ey a bin riba mesa ultimo momento, no por a keda cla di negocia esaki prome cu Conseho di Minister di Reino dia 17 di december ultimo.

“Gobierno di Aruba ta hopi satisfecho di por lesa den e carta di siman pasa cu Secretario di Estado Knops a dirigi na Tweede Kamer na Parlamento Hulandes cu e ta dispuesto di papia di un fecha final pa e protocol. Esaki ta habri caminda pa Aruba y Hulanda sigui na mesa y sali for di e impase aki pronto y cu esey lo por conduci cu Aruba por bin na remarke atrobe pa sosten di likides”, Prome Minister a duna di conoce.

RECORTE 12.6%

Prome Minister a indica tambe cu, “Ainda ta keda e punto di recorte di 12.6% y aki ta unda Aruba y Hulanda no ta riba e mesun liña ainda. Mi a pidi Hulanda pa permiti Aruba stop e recorte e 12.6% pa 2022, pero Secretario di Estado Knops a indica cu Hulanda ainda no ta di acuerdo cu esey. Unabes nos sali di e impase aki di e protocol, nos lo sigui papia riba e tema di 12.6%”.

Share:

Leave a Reply

Your email address will not be published.