Atraco arma riba señora bendedora ambulante na Hooiberg

Diasabra madruga a drenta informe di un atraco arma na altura di Hooiberg 49, mesora a dirigi patruyana na e sitio. Na yegada di e patruya a bin compronde cu aki ta trata di algun hoben cu lo a atraca un señora di nacionalidad Venezolana cu ta bende mercancia di cas pa cas. Un supuesto cliente a yam’e pa trece mercancia pe na e adres ey y eynan a atrak’e y bay cu su mercancia y placa. E victima a reconoce e accento di e atracadonan como Venezolano tambe!

E señora a conta Polis na yoramento cu ta placa cu su amiga mester hiba Venezuela awe ainda. Ta di esaki nan ta biba y cria nan famia, pues no por caba di compronde con por tin hende asina malo na mundo. E ta bisa di no conoce e atracadonan y cu nan ta parce hoben. 

El a haya un yamada di un posibel cliente cu a dune un adres pa e pasa cu su mercancianan pa nan mira y cumpra. A dun’e un locacion y ora el a yega algun homber hoben a haci comosifuera ta biba na e cas ey y cu su casa ta paden. Pa ora e señora kier baha pa habri maleta pa mustra kico tur e tin pa bende, a sali mas homber arma y nan a bay cu su mercancianan y su placa. Den e mercancianan tabatin paña, joyas y sapato. 

Polis a tuma tur dato y a start un investigacion mesora. Recherchenan di atraco team lo añadi e caso aki na e lista di atraconan tumando luga ultimo simannan riba nos isla. 

Share:

Leave a Reply

Your email address will not be published.