![](https://www.awe24.com/wp-content/uploads/2019/12/6254A91F-A7B7-4D49-B816-114D777250D1-640x334.jpeg)
Diadomingo madruga tabatin un pelea den Well Well Bar & Restaurant na Hooiberg. Polis a presenta pa reestablece ordo publico, aunke cu e bringado a bandona e sitio caba. Nan a identifik’e como un persona cu sa bin bebe eyden caba, pero cu e biaha aki a bin cu su casa y den e proceso a cuminsa maltrata e señora. Otro clientenan a sali na defensa di e dama y esaki a causa un pelea.
Den su rabia, ora e homber machista a sali pafo, el a destrui bentana di un auto staciona dilanti di e bar. Na final el a bandona e sitio prome cu Polis a yega pa por atende cun’e. E daño na e auto tabata considerabel, pa cual lo exigi di dje awo responsabilisa financieramente pa e gastonan innecesario cu e doño di auto ta hay’e aden awo, sin tabatin ni “arte ni parte” den e pelea.
Testigonan a conta cu e homber tabata sinta na bar masha bon cu su casa. Dado momento, pa motibo di jaloezie a start un discucion, probablemente como cu e homber tabata betra caba y a dal e señora masha duro. Clientenan masculino a purba interveni pa evita mas agresion contra e dama, pero parce cu ta mas violento e “macho crioyo” a bira eyden.
A start un “tangana” pa cual varios stoel y mesa a spat den e proceso. A opta pa yama Polis pa pone ordo y detene e bringado. No tabatin forma pa calm’e di e rabia cu e tabatin den su curpa. Pafo el a kibra un auto di otro cliente, a subi su mesun auto y a bandona e sitio. Claro cu imagennan di video capta pa camara di siguridad tanto paden como pafo di e bar awo ta sirbi como evidencia pa persigui e homber aki.
![](https://www.awe24.com/wp-content/uploads/2019/12/82267F1B-098E-47C5-82F8-55951FF8179C-1024x997.jpeg)