Discurso di Prome Minister riba Dia di Betico: LUCHA Y BENEFICIONAN DI STATUS APARTE

Un logro cu a inculca den nos ciudadanonan un patriotismo grandi

Dia di Betico, diamars 25 di januari, Aruba a celebra e dia aki na un forma diferente pero na grandi apesar cu mester a mantene na reglanan pa cu Covid. Gobierno di Aruba no a laga e dia pasa sin mas y riba Plaza Betico Croes tawata tin e acto protocolar di costumber riba e dia cu Aruba ta celebra e fecha natalicio di un gran politico di nos pais.

E LUCHA PA STATUS APARTE

Den su discurso durante e acto protocolar, Prome Minister Evelyn Wever-Croes a enfatisa riba e logro di Betico Croes pa uni nos pueblo. Un union cu tabata e forsa mas grandi tras di e lucha pa Status Aparte.

Prome Minister a indica cu Betico Croes no a cuminsa cu e lucha pa Status Aparte di nos pais. Politiconan grandi prome cu su tempo ya a cuminsa expresa e deseo di nos pueblo di ta ‘baas den nos mesun cas’. Sinembargo e lucha cu a cuminsa den añanan 40, a wordo bandona, y ta Betico den añanan 70 a gara e bandera di e lucha ey, y a hib’e te na su final.

“Ta manera un cas. Betico a haya e fundeshi construi, pero debi na abandono, e fundeshi tabata den mal condicion. El a fortifica e fundeshi, el a lanta e murayanan, el a percura pa e dak y asina a construi e pais Aruba cu awe nos ta biba aden. El a entrega nos e yabi di un Pais autonomo, pero lamentablemente e mes no a biba pa por a experiencie, ni goza di dje. Nos tin e privilegio di biba den e pais autonomo, pa nos lanta nos yiunan den e pais aki”, Prome Minister a expresa.

BENEFICIONAN DI STATUS APARTE

Status Aparte a trece hopi bienestar y progreso pa Aruba. E lucha cu nos pueblo a hiba pa logra nos Status Aparte a inculca den nos ciudadanonan un patriotismo grandi. Ta danki na nos Status Aparte, Aruba por a desaroya den un di e paisnan lider den nos region, y e lucha cu Betico a lidera, a inspira otro pueblonan pa lucha pa nan autonomia tambe.

Aruba desde Status Aparte, tin e admiracion di hopi otro paisnan. Hopi biaha den exterior hendenan ta gaba Aruba. Nan ta puntra nan mes, ta con Aruba si ta haci esaki of esaya? Dicon Aruba ta asina exitoso por ehempel den e area di turismo? Con Aruba ta logra cosnan grandi, relativamente facil? 

E contesta cu nos como Arubiano por duna nan ta cu Aruba ta bendiciona. Y nos sa cu Aruba ta bendiciona. Pasobra nos a lucha, nos ta lucha y nos lo sigui lucha cu alma y cuerpo pa hiba nos pais padilanti. Manera Betico a bisa nos ‘si mi cay na caminda, gara e bandera y sigui cu e lucha’, awor ta momento pa nos cada un gara e bandera, y sigui cu e lucha. E lucha den nos bida diario, cu nos famia, na nos trabou, den nos districtonan. Gara e bandera ey cu orguyo, y ban sigui cu e lucha, pa asina hiba nos hogar, nos trabou, nos districto, nos pais padilanti.

“Pasobra, ni con dificil cosnan por ta tin biaha, nos sa cu mayan solo ta sali bek, y nos lo bolbe lucha, cu mesun fervor pa hiba nos pais padilanti. Dicon nos sa esey? Pasobra Betico a mustra nos, Betico a lidera nos. Betico ta nos ehempel”, Prome Minister Evelyn Wever-Croes a expresa.

Laga nos cada un busca e balornan, principionan cu Betico a siña nos, cu el a mustra nos. Pa asina enfrenta e retonan actual cu determinacion, perseverancia y den union. Lucha pa bo soñonan y nunca rindi.

Share:

Leave a Reply

Your email address will not be published. Required fields are marked *