Oranjestad – 14 februari 2022 – Durante fin di siman a tuma lugar e gran final di Copa Aruba Bank, e Campeonato di futbol di Damas organisa pa Arubaanse Voetbal Bond. Aruba Bank ta hopi contento di por a sostene e equiponan di damas durante 12 siman di e campeonato.

Diadomingo mainta na e mini veld di Compleho Deportivo Franklyn Bareño e equiponan di Estrella y Dakota a bataya pa e tercer y cuarto lugar den Youth League. Despues e equiponan di Britannia y RCA a hunga pa e Segundo lugar y campeon. Den e categoria di Youth League e equipo di Britannia a titula campeon.

Parti atardi a sigui e weganan masa emocionante di Open Class unda RCA a titula campeon y e team di Britannia a keda na di dos lugar. Estrella a keda den e tercer puesto y di cuarto lugar a keda e equipo di La Fama.

Sra. Gina Habibe, Executive Director di Aruba Bank a ricibi un obsekio for di Presidente di AVB, sr. Randolf Lacle, como aprecio pa e confianza y sosten duna na e deporte di futbol di damas.

Un pabien ta bai pa AVB pa e tremendo organizacion y tambe tur e equiponan di damas cu a participa na Copa Aruba Bank!