A.T.A. a reconoce tres empleado ehemplar pa e trabao eherci den aña 2021.

Recientemente Oficina di Turismo, A.T.A. a reconoce tres empleado ehemplar pa e trabao eherci den aña 2021.

A reconoce e tres empleadonan cu a ricibi mas punto for di coleganan a base di e programa di Standing Ovation Awards/Hi-Fives cu a wordo introduci algun aña atras. Coleganan por duna otro Hi-Fives basa riba diferente accion y balornan cu A.T.A. ta para pa nan. Di e forma aki ta duna tur empleado e mesun oportunidad pa wordo reconoci door di nan coleganan.

Na di tres luga cu mas hopi punto a sali Amayra Boekhoudt, Trade Relations Liaison. Amayra a ricibi diferente Hi-Five y comentarionan basa riba su disponibilidad y habilidad pa yuda su coleganan. Amayra a yuda crea momentonan memorabel tambe entre otro pa coleganan cu a retira despues di hopi aña na A.T.A. Otro mencionnan cu Amayra a ricibi tawata basa tambe riba tur e actonan di generosidad y bondad cu Amayra ta encurasha su coleganan pa tuma parti aden.

 

Na di dos luga cu mas hopi punto a sali Sjeidy Dijkhoff – Feliciano, Communications Manager. Sjeidy a sali na prome luga di e Standing Ovation Awards 2020 y na 2021 su coleganan a bolbe dun’e Hi-Fives y asina el a yega den e top tres. Sjeidy a ricibi Hi-Fives pa su esfuersonan haci durante e pandemia pa yuda huespednan pero tambe pa su apoyo na coleganan cu diferente proyecto y iniciativa.

 

Na di prome luga cu mas hopi punto a sali Jonathan Boekhoudt, Trade Relations Liaison, miho conoci como ‘Pachi’. Jonathan a ricibi Hi-Fives for di su coleganan pa diferente iniciativa cu e ta parti di dje, incluyendo e ‘nature hikes’ cu e ekipo di A.T.A. a cuminsa haci durante pandemia. Tambe Jonathan a wordo reconoci pa su hospitalidad no solamente cu su gruponan di bishitante pero sigur tambe cu su coleganan cu e semper e ta cla pa yuda, sin pensa mes. Su papel importante durante e pandemia pa cu e servicio na cliente adicional cu A.T.A. a institui tambe a wordo reconoci pa coleganan. Pachi a sali na di dos luga na 2020.

 

Den transcurso di e ultimo dos añanan na A.T.A., mescos cu na hopi otro organisacion, hopi trabao a cambia y hopi hende mester a adapta na responsabilidadnan nobo paso e esencia di nan trabao no tawata mescos mas. E agilidad cu e ekipo completo a desplega pa asumi responsabilidadnan nobo y adapta na e circumstancianan sigur ta algo sumamente remarcabel y ta di aplaudi.

 

Gerencia di A.T.A. ta sumamente agradecido pa tur e esfuerso y trabao di cada un di e miembronan di e ekipo y ta felicita un bes mas e ganadonan di e Standing Ovation Awards 2021. Kier resalta cu logronan ta danki na esnan laborando na Aruba pero sigur tambe na esnan cu ta labora na oficinanan na Merca, Hulanda y Colombia. E ekipo na Aruba ta orguyoso y agradecido na nos coleganan internacional.

Share:

Leave a Reply

Your email address will not be published. Required fields are marked *