Mayan Hues ta tuma un decision, Fiscal no kier duna abogadonan documentonan den caso Avestruz

 

ORANJESTAD – Awe mainta tur e abogadonan di e sospechosonan den caso Avestruz tabata presente pa scucha e reaccion di Fiscal riba nan peticionnan. Por a compronde cu algun di e abogadonan a reacciona riba Fiscal.

   Fiscal a bisa Hues cu Ministerio Publico no ta contra pa scucha testigonan. Por compronde cu abogadonan lo kier haya informacionnan. Sinembargo Fiscal a bisa cu Ministerio Publico ta contra pa scucha algun testigo pasobra no ta haya esakinan relevante.

   Fiscal a bisa Hues cu Ministerio Publico ta keda mantene su punto di bista esta cu no ta haci entrega di documentonan y declaracion di Sevinger haci na Landsrecherche.

Riba e peticion di abogadonan pa para e prohibicion di contacto pa cierto di e acusadonan, Fiscal a bisa Hues cu ta hala e prohibicion aden.

   Pa loke ta interogacion di testigonan, Fiscal a propone pa mihor laga esaki sosode serca Hues Comisario y no den Corte ora di tratamento. Esey lo haci e proceso mas facil.

Riba e peticion pa scucha abogado como testigo di algun testigo, Fiscal ta haya cu por spera cu nan lo bay haci uso di nan derecho di silencio di profesion y pesey no ta haya cu ta necesario.

Fiscal a bisa Hues cu lo duna bek administracionnan confisca di e sospechosonan.

   Mr. Oomen di Biemans y Werleman a reacciona riba e punto di bista di Fiscal cu no mester interoga abogadonan. Mr. Oomen ta kere cu yama e abogadonan pa interogacion y laga nan mes dicidi. El a bisa Hues cu abogado tin derecho y no obligacion pa silencio di profesion.

   Mr. Oomen tambe a bisa Hues cu mester duna abogado e oportunidad cu durante interogacion di testigonan por haci preguntanan.

   Mr. Canwood a reclama pakico no ta scucha algun di su testigonan, kendenan e ta haya importante.

   Mr. Carlo a remarca cu si e investigacion ta sera manera Fiscal a bisa, mester duna bek tur loke a confisca.

   Mr. D. Kock a puntra Fiscal pa ki tempo lo por haya administracion y documentonan di su clientenan.

   Hues a bisa cu e ta bay evalua y mayan mainta lo tin decision.

Share:

Leave a Reply

Your email address will not be published. Required fields are marked *