Bishita e ultimo dianan di exposicion TERA | SOIL.            

Cas di Cultura su exhibicion di arte visual actual, bou di e capa di AUA Exhibits ’21-’22, ta titula TERA|SOIL. E ta un duo-show cu ta presenta e obranan di artistanan local Olga Gabrielle y Jess Wolff. Den nan obranan, Gabrielle y Wolff ta haci uzo di naturalesa como inspiracion pero tambe como material.

Gabrielle a haya den e paisahe crudo di nos isla un espacio unda e por comunica cu e presente y pasado di nos pais. Wolff ta colecciona y experimenta cu obhetonan natural  creando asina materialnan artistico nobo. Nan encuentro cu e paisahe Arubano ta resulta den procesonan artistico cu ta yuda nos reflexiona riba nos comunidad y nos mesun identidad. E exhibicion ta mustra con tur dos artista ta interactua cu naturaleza di un manera direfente y harmonico.

E exhibicion TERA | SOIL lo ta habri pa publico e weekend aki, diabierna 8 y diasabra 9 di april, di 6pm te cu 9pm. Tambe di dialuna 11 di april te cu dia di ciere, cu ta diaranson 13 di April 2022, di 9am pa 4:30pm non-stop. AUA Exhibits ’21-’22 ta un serie di exhibicion presentando arte visual di artista local bou di curaduria di historiador di arte Ana María Hernández. Cas di Cultura ta gradici Mondriaan Fonds Hulanda y Prins Bernhard Cultuurfonds Caribisch Gebied pa nan aporte financiero cu ta haci posibel pa por organisa e serie aki y asina stimula arte contemporaneo di y na Aruba.

Share:

Leave a Reply

Your email address will not be published. Required fields are marked *