TANKI LEENDERT – Diamars ultimo, bispo di Dia di Rey, amantenan di bon biyar, specialmente es’nan cu suficiente cabey blanco pa corda e ‘golden age’ di biyar Arubiano den decadanan di 1990 – 2010, por a pasa un anochi sumamente exitoso den e torneo ‘recordar es vivir’ entre e gang feroz di cachonan brabo MAD DOGS y e campeonnan di tur tempo BARRACUDA. TT Billiardstabata tin e honor di organisa cu hopi exito un torneo caminda di antemano caba un y tur tabata sa cu aki ta candela cu gasolin ta topa otro y c’un simpel chispa por pega mondi na candela! Porta di santana aparentemente a keda habri pasobra di tur skina di Aruba biyaristananlegendario a kruip sali for di nan caha y gatia manera zombie sin futuro den direccion di TT Billiards na Tanki Leendert.

Roukos ‘Balboa’ di Barracuda ta habri e bataya cu exito ganando nada menos cu Javier Quandus di Mad Dogs. Allan van Aanholt di Mad Dogs ta hala cos pone recht y ta gana Gino Geerman di Barracuda. Score ta 1-1 y cos ta mustra cu e anochi aki ta bay ta uno largo! E flor di biyar, Pepe ‘The Rose’ La Rosa ta entama su mala maña y ta pone Roderick di Mad Dogs blaf ‘een toontje lager’! Barracuda ta pika dilanti cu 2-1. Ditto Acosta, campeon Panamericano 2002, no a perde pulso contra AndyGeerman di Mad Dogs y ta pone Barracuda tuma bentaha cu 3-1!

Tagteam David Brete y Filipino Rod tabata tin tur cos den nan man pa pone Barracuda bay dilanti cu 4-1, pero Arie‘La Vacuna’ Jansen y Mitchell ‘The Pitbull’ Kelly ta bons bek y ta pone Mad Dogs corta bentaha te na 2-3. Un di e biyaristanan mas aclama di Barracuda, esta Aaron ‘TheBaron’ Franken ta corta curpa mahos contra Angelo‘Machete’ Tromp, y bou blafmento feroz e bataya ta empata sensacionalmente na 3-3! Cachonan brabo a cuminsa bira ‘woelig’! Jorzinho Everon na un manera solido ta pone Barracuda pika dilanti atrobe cu 4-3, pero “right back at y’a” Master Ryan Ramersaud ta dal Didi pa asina bou blafmento infernal e bataya empata 4-4! por ultimo, Armand ‘De Ridder’ Ridderstap di Mad Dogs ta vence Jason ‘Friday the 13th’ Kock di Barracuda pa asina Mad Dogs gana cu score di 5-4! Di eynan e gang di cacho brabo a start un celebracion cu a pone koning Willem para chikito chikito!