Diasabra anochi a drenta informe di un accidente basta serio cu hende herida y ega den auto na e rotonde banda di R.C.A. na Solito, mesora a dirigi tanto polis, ambulans como tambe e equipo di rescate di bombero na e sitio. Na e yegada di e patruya a tuma nota cu aki ta trata di un accidente entre un truck y un Toyota Corolla unda e truck tabata bini for di Tanki Leendert mientras e Corolla tabata bini di Hubadastraat y ambos a bini cu velocidad sin para sin tene na cuenta cu aki tin un rotonde. E truck a dal riba e Corolla pusha esaki un bon distancia for di caminda. Debi na e fuerte impacto 3 persona den e Corolla a resulta herida di cual 2 ta mucha hoben mientras e dama chauffeur a keda pega den auto. Na yegada di e ambulans nan a atende e muchanan y a transporta nan mesora pa hospital, mientras na yegada di e equipo di rescate a cuminsa cu trabaonan di rescate pa asina logra saca e dama. Despues di un rato a logra libera e dama y e personal di e di tercer ambulans a transporta e dama pa hospital. Polis di trafico a presenta como tambe e investigadornan tecnico y forensyco pa asina documenta e accidente aki.